Almatyda 5 jasar bala menıngıt juqpasynan kóz jumdy. Bul bıyl qaıtys bolǵan 3-shi adam. Bul týraly qalalyq Qoǵam densaýlyǵyn qorǵaý departamentiniń basshysy Aızat Moldaqasymova aıtty, dep habarlaıdy QazAqparat tilshisi.
Departament basshylyǵy qaza bolǵan adamdardyń barlyǵynda aýrýdyń jedel túri bastalǵanyn aıtty.
Onyń aıtýynsha, sońǵy kúnderi aýrýhanalarǵa 47 adam júgingen. Olardyń 15-inde dıagnoz zerthana arqyly rastalǵan.
«Bul oqıǵalar bir-birimen baılanysty emes. Birinshi jaǵdaıda er adamda kókbaýyrdyń joq bolǵandyqtan ımmýnıtetti álsiz boldy. Ol adamnyń ómirin arashalaı almadyq. Ekinshi jaǵdaıda, jas qyz ben 5 jastaǵy bala birden asqynatyn túrine shaldyǵyp tez arada kóz jumdy. Olarmen baılanysta bolǵan 715 adam dárigerler baqylaýynda», - dedi Aızat Moldaqasymova.
Dárigerler Almatyda indet burq etti dep dabyl qaǵýdyń qajettiligi joq ekendigin aıtty. «Aýrýdyń úlken merzimdilikke ótýi 10-15 jylda bir kezdesedi. Iаǵnı, 2010 jyly - 28 adam, 2011 jyly - 44 adam, 2012 jyly -23 adam, 2016 jyly 66 adam aýrýǵa shaldyqqan. Birinshi kezekte ımmýnıteti álsiz adamdar juqtyrady», - dedi A. Moldaqasymova.
Dárigerlerdiń aıtýynsha, 18 mamyrda balabaqshada júrgende balanyń dene qyzýy kóterilgen. Keshke taman úıge kelgende býyndary aýyra bastaǵan. Birneshe saǵat ótken soń balanyń aıaqtary qyzara bastaıdy. Shuǵyl túrde shaqyrylǵan jedel járdem balany túngi saǵat 00:50 balalar aýrýhanasyna alyp kelgen. Alaıda, dárigerler aýrýdyń jyldam asqynýyna baılanysty balanyń ómirin arashalaı almady.
S.Asfendııarov atyndaǵy QazUMÝ professory, juqpaly jáne tropıkalyq aýrýlar kafedrasynyń meńgerýshisi Dúısenova Amangúldiń aıtýynsha, kóz jumǵan eresek adamdardyń biri - áıel adam da, tamaǵy aýyryp, qyzýy kóterilse de erteńgisin jumysqa barǵan.
«Kókbaýyry joq adam aýrýmen kúresip 10 kún jansaqtaý bóliminde jatqan. 10-kún degende ol kóz jumdy», - dedi dárigerler.
Dárigerler Almaty turǵyndary men qonaqtaryna adam kóp shoǵyrlanǵan jerge barmaýǵa keńes berdi. «Qazi barlyq uıymdarda mádenı sporttyq sharalardy azaıtýǵa tyrysyp jatyrmyz. Halyqqa aldyn ala túsindirý jumystary júrgizilýde. Aýyrǵan adamnyń barlyǵy birdeı kóz jumbaıdy. Mysaly, Almatyda juqpaly aýrýlar aýrýhanasynda 2 adam menıngokoksemııa dıagnozynan jazylyp keledi. Sondaı-aq, menıngıt aýrýy bir sátte juqpaıdy. Iаǵnı, 3 aptadaı ýaqyt aralasqan soń ǵana juǵýy múmkin. Sol sebepti, bul qalypty jaǵdaı degim keledi», - dedi Amangúl Dúısenova.