Parlament Senatynyń Tóraǵasy Qasym-Jomart Toqaev Birikken Arab Ámirlikteri Ulttyq Federaldyq Májilisiniń depýtaty, Toleranttyq jáne beıbitshilik jónindegi jahandyq keńestiń tóraǵasy Ahmed ben Muhammed ál-Djarvandy qabyldady, dep habarlady Senattyń baspasóz qyzmeti.
Q.Toqaev Qazaqstannyń Birikken Arab Ámirlikterimen yntymaqtastyǵynyń joǵary qarqynyna toqtala kelip, oǵan memleketter basshylarynyń arasyndaǵy ózara senimdi qatynastar tikeleı yqpal etip otyrǵanyn atap ótti.
Senat Tóraǵasy Álemdik jáne dástúrli dinder kóshbasshylarynyń sezin shaqyrý týraly Prezıdent Nursultan Nazarbaevtyń bastamasynyń iske asýy jóninde meımanǵa áńgimelep berdi. «Dinı kóshbasshylar, memleket basshylary men iri halyqaralyq uıymdardyń jetekshileri, tanymal saıasatkerler qatysatyn bul forým jahandyq máselelerdi sheshý joldaryn izdestiretin, toleranttyq pen ózara túsinistik qaǵıdalaryn nyǵaıtatyn erekshe alań bolyp otyr», dep atap ótti Q.Toqaev.
Ahmed ben Muhammed ál-Djarvan álemdik dinder ókilderiniń arasyndaǵy ózara túsinistikti nyǵaıtýdy, aımaqtyq jáne halyqaralyq turaqtylyqqa járdemdesýdi maqsat etetin Jahandyq toleranttyq jáne beıbitshilik keńesiniń jumysy bastalǵany týraly habardar etti.
Parlament joǵarǵy palatasynyń basshysy dinaralyq únqatysý salasyndaǵy Qazaqstan bastamasymen úılesetin Keńestiń qurylýyna qoldaý bildirdi. Q.Toqaevtyń pikirinshe, Sezd Hatshylyǵy men Jahandyq Keńes dinaralyq únqatysýdy, ózara tolerant- tyqty, beıbitshilik pen qaýipsizdikti ilgeriletý jáne nyǵaıtý maqsatynda áriptestik qatynastardy ornyqtyra alady. Ámirlik parlamentshisi usynystyń keleshegi zor ekenin aıta otyryp, kelisetinin jetkizdi.
Q. Toqaev Ahmed ben Muhammed ál-Djarvandy qazan aıynda Qazaqstan Astanasynda ótetin Álemdik jáne dástúrli dinder kóshbasshylarynyń VI sezine kelip qatysýǵa shaqyrdy.