Aýyldan aýdan ortalyǵyna medısınalyq tekserýge kelgen tórt jasóspirimniń emhana mańaıynda alańsyz shekildeýik shaǵyp, áńgimege eltip turǵanyn ýchaskelik ınspektordyń «qyraǵy kózi» baıqap qalyp, zamatta hattama toltyrady.
Bárine de aıyppul salady. Olardyń «aǵataı, keshirińiz, quldyǵyńyz bolaıyq. Kúl-qoqys shashqan jerdi tilimizben jalaǵandaı tazalap bereıik. Endigári qaıtalanbaıdy «degen jan shyrylyn shybyn shaqqan qurly kórmeıdi. Aı-kúnniń amanynda bastary shatylǵan «tórt batyrdyń» eń kishisi 14 jastaǵy Danııl tolyqqandy otbasydan bolǵandyqtan, onyń moınyna qos birdeı aıyppuldy ilindirip jiberedi. Qalǵan úsheýi tek shesheleriniń qaraýynda ekeni eskerilip, jeńildeý sharamen qutylady.
Danııldiń anasy Natalıanyń shyr-pyr bolyp otqa da, sýǵa da túsýden taıynbaıtyn túri bar. Ýchaskelik ınspektordyń is-áreketi de, eki aıyppul tólettirýi de zańsyz degen dáıekti alǵa tartyp, aýdandyq sotqa júgingen eken, ótinishin qanaǵattandyrmaı tastaǵan. Odan is oblystyq sotqa túsip, ákesi ǵana aıyppul tólesin degen sheshim shyǵarǵan.
Balanyń advokaty da zań talaptarynyń óreskel burmalanǵanyna bultartpas derekter jetkilikti dep otyr. Onyń aıtýynsha, kámelettik jasqa tolmaǵan jetkinshekterge hattama kýágersiz, ata-analardyń qatysýynsyz toltyrylǵan. Mekteptiń áleýmettik pedagogy shaqyrylmaǵan. Baqylaý kamerasynyń jazbalary aldyrtylmaǵan. Tártip buzýshylyq oryn alǵan jáne hattama toltyrylǵan kúnder ártúrli. Sondyqtan taǵy da sotqa júginbekshi.
Zańgerler bolsa, daý-damaıdyń órshýin zańnyń solqyldaq tustarynan izdeıdi. Olardyń aıtýlarynsha zańda kámeletke tolmaǵan bala tártip buzsa, ata-anasyna aıyppul salynsyn degen bap qarastyrylǵan. Quqyqtyq qujattyń ár qarpin týra túsinetin, buljytpaı oryndaıtyn tártip saqshylary ákesin de, anasyn da jazalaǵan.
Al esh jerde jumys istemeıtin Natalıa balam 17 myń teńge aıyppul tóleıtindeı bas jaryp, kóz shyǵarǵan joq qoı. Eskertýmen shektelse, qazandary ortaıyp qala ma dep kúıip-pisýmen júr.
О́mir ESQALI, «Egemen Qazaqstan»
Soltústik Qazaqstan oblysy