Qazaq drama teatrynyń sańlaqtary Serke Qojamqulovty, Elýbaı О́mirzaqovty, Qapan Badyrovty bergen Qostanaı-Torǵaı topyraǵy odan keıin de halqymyzdy darynnan kende etken joq.
Qazaq teatrynyń orta tolqynynda Ánýar Boranbaevtyń orny da, eńbegi de erekshe bolatyn. Sahnada Abaıdan bastap, «Aıman-Sholpandaǵy» Arystan, «Qarakózdegi» Syrym, «Qobylandydaǵy» Birsimbaı, «Eńlik-Kebektegi» Kembaı, Ý.Shekspırdiń «Asaýǵa – tusaýyndaǵy» Lıýchensıo, «Qan men terde» Elaman, «Aq kemede» Momyn shal, «Ana – Jer-Anada» Maısalbek sııaqty kóptegen rólderin joǵary kórkemdikpen somdaǵan edi. Al kınoda basqasyn aıtpaǵanda, bir «Gaýhartastaǵy» Tastannyń ózi akterdiń atyn qazaq kınosy tarıhynda qaldyrdy.
Amangeldi aýdanynyń 90 jyldyǵyna jáne bıyl Ánýar Boranbaevtyń týǵanyna 70 jyl tolýyna oraı aýdandyq kitaphananyń oblys ortalyǵyndaǵy kúnderi sheńberinde jerlesteri akterdiń eske alý keshine jınaldy. Oǵan Ánýardyń talantyn erekshe baǵalaıtyn kórermenderimen qatar, Amangeldiden, Astanadan týystary men jary, synyptastary keldi. Akterdiń ómiri men shyǵarmashylyǵyna arnalǵan kórme tusynda kórermen kóp kidirdi. Keshke jınalǵandar Ánýardyń tutynǵan buıymdarymen qatar onyń foto sýretterin, ol týraly jazylǵan estelik kitaptardy, teatr sahnasynda ózi oınaǵan spektaklderge paıdalanǵan zattaryn tamashalady.
Keshte ony jaqsy biletin týǵan-týys, dos-jarandary, jary estelikter aıtty.
– Balalyq shaǵymyz birge ótti. Ol kezde mektepti bitirgenderdiń bar armany oqýǵa túsý úshin Almatyǵa barý bolatyn. Ol kezde mamandyqtyń eń kúshtisi agronom, ekonomıst, dáriger, mal dárigeri bolyp sanalatyn. Kópshiligimiz Almatydaǵy ınstıtýttarǵa túsip, sol mamandyqtardy alyp shyqtyq, aýylǵa keldik. Ánýar da týǵandarynyń qalaýymen Aýyl sharýashylyǵy ınstıtýtynyń Agronomııa fakýltetine túsken bolatyn. Biraq ony alǵashqy kýrstardan tastap ketti de, júrek qalaýymen óner jolyn qýdy. Ol mektepte júrgende ádebıetten myqty bolatyn, – deıdi synyptasy Haırolla Hasenov.
Aýyldastary Ánýardyń kishipeıil, qarapaıym, adamgershiligin kóbirek aıtty. Onyń aýylǵa kelgenin aýdan basshylary bilmeı de qalatyn. Ataǵym bar eken dep, aýdan basshylaryna kirip, ózine jaǵdaı jasaýdy, kólik berýdi surap kórmepti. Tipti eki aýyldyń arasyna atarbamen kete beredi eken. Onyń sahna syrtynda, otbasynda qandaı bolǵanyn jary Aqbópe de saǵyna áńgimeledi.
– Ánýar aýylyna, týǵan jerine eshteńe teń keltirmeıtin, óte jaqsy kóretin. Amangeldige baryp, Ánýardyń tabanynyń izi qalǵan topyraqty basqanyma máz bolyp kelemin. Men de akterler otbasynanmyn ǵoı. Ony teatr sahnasynan kórgende ózim áli mektep qabyrǵasynda júrgen qyz edim. «Qandaı sulý jigit!» dep tańǵalǵanmyn. Sahnadaǵy jigittiń sol sulý beınesi oıymnan shyqpaı júretin. Keıin jolymyz báribir túıisti. Onyń talanty ǵana emes, adamgershiligi, tekti jaratylysy keremet edi. Men baqyttymyn, ondaı azamatpen birge ǵumyr súrý ár áıeldiń armany ekenin bilemin. Nesin aıtasyń, ǵumyry qysqa boldy, taǵdyr bizdi aıyryp jiberdi. Biraq eli-jurty umytqan joq, sondyqtan ony árkez tiri dep bilemin. Búgin de Ánýar ortamyzda otyrǵandaı tolqyp turmyn, – dedi Aqbópe Boranbaeva.
Amangeldi aýdanyndaǵy ózi oqyǵan mektepke Ánýar Boranbaevtyń esimi berilgen. О́ner qýǵan jastarǵa Ánýardyń kınoda somdaǵan beıneleri ómirlik mektep bolary haq. Jerlesteri aýylǵa Ánýar kelip qalǵandaı, taǵlymy mol, saǵynyshqa toly keshtegi estelikterden serpilip tarasty.
Názıra JÁRIMBET, «Egemen Qazaqstan»
QOSTANAI