Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń músheleri Jambyl oblysyna kóshpeli otyrys barysynda sýarmaly jerlerdi paıdalaný, sý qatynastaryn quqyqtyq retteý, jaıylymdaǵy mal sharýashylyǵyn damytý máselelerin talqylady.
Komıtet tóraǵasy Jeńis Nurǵalıev otyrysty asha kelip, Memleket basshysynyń 10 qańtardaǵy Joldaýynda: «Agrarlyq saıasat eńbek ónimdiligin túbegeıli arttyrýǵa jáne óńdelgen ónimniń eksportyn ulǵaıtýǵa baǵyttalýy kerek. Shıkizatty qaıta óńdeýdi qamtamasyz etip, álemdik naryqtarǵa joǵary sapaly daıyn ónimmen shyǵýymyz qajet. Sonymen qatar jerdi barynsha tıimdi ıgeretinderdi yntalandyryp, al durys paıdalana almaıtyndarǵa shara qoldaný kerek. Tıimsiz sýbsıdııalardy aýyl sharýashylyǵy kesheni sýbektilerine arnalǵan bank nesıelerin arzandatýǵa qaıta baǵyttaý qajet. 5 jyl ishinde agroónerkásip keshenindegi eńbek ónimdiligin jáne óńdelgen aýyl sharýashylyǵy óniminiń eksportyn, tıisinshe, kem degende 2,5 esege arttyrýdy tapsyramyn», - degen tapsyrmasyn eske saldy.
J. Nurǵalıev óz sózinde Jambyl oblysy sýarmaly jerlerdiń kólemi boıynsha elimizde aldyńǵy qatardyń birinde ekenin atap ótti. Sonymen birge bul salada birqatar ózekti máseleler de bar ekeni aıtyldy. Atap aıtqanda, aýyl sharýashylyǵy mınıstrligindegi sý resýrstary jónindegi komıtetiniń málimetteri boıynsha, aımaqtaǵy 229,7 myń gektar sýarmaly jerlerdiń 86 myń gektary óz maqsatynda paıdalanylmaıdy. J. Nurǵalıev atap ótkendeı, kóptegen sharýashylyqtarda sýlandyrý-drenaj júıeleri men sharýashylyq aralyq sý qubyrlarynyń tozyǵy jetken. Depýtattyń pikirinshe, bul nysandarǵa pasporttaý rásimderin júrgizip, tıisti deńgeıde paıdalanýǵa berý kerek.
J. Nurǵalıev sonymen qatar jaıylymdyq jerler týraly zańnamaǵa túzetýler engizýge baılanysty máselelerge toqtaldy. Onyń pikirinshe, bul baǵyttaǵy zańnamalyq bazany jetildirý jumystaryn jalǵastyra berý kerek.
Oblys ákiminiń orynbasary Máden Mýsaev 2017-2021 jyldarǵa arnalǵan aýyl sharýashylyǵy keshenin damytýǵa arnalǵan memlekettik baǵdarlamany aımaqta iske asyrý barysy týraly depýtattarǵa baıandady.
Talqylaýǵa birqatar memlekettik organdardyń, sharýa qojalyqtary men aýyl sharýashylyǵy kooperatıvteriniń basshylary qatysty.
Senatorlar sol kúni Jambyl oblysynyń ákimi Asqar Myrzahmetovpen kezdesý barysynda aımaqtyń áleýmettik-ekonomıkalyq damýynyń keleshegin talqylady.
Depýtattar sapar aıasynda M.H. Dýlatı atyndaǵy Taraz memlekettik ýnıversıtetinde, «Qazfosfat» mekemesi men Jambyl aýdanyndaǵy «Shyǵys baqshalary» jaýapkershiligi shekteýli seristestiginde, T. Rysqulov atyndaǵy aýdandaǵy «Manat» jáne «Shaýshen» sharýa qojalyqtarynda boldy.
Depýtattar Jýaly aýdanynda bolǵan kezde «Gambýrg» jáne «BURNOYE SOLAR-1» seriktestikterine baryp, «Qazaq handyǵy» eskertkishi men Aısha-bıbi mavzoleıinde boldy.
23 mamyrda depýtattar «Kóne Taraz» tarıhı-mádenı ortalyǵyn kórýdi jáne Qarahan baba men Tekturmas eskertkishterine barýdy josparlady.