Búgin Astanada 71 Kann kınofestıvalinde úzdik aktrısa atanǵan Samal Eslıamovanyń qatysýymen baspasóz konferensııasy ótti. Jıynǵa mádenıet jáne sport mınıstri Arystanbek Muhamedıuly, rejısser Sergeı Dvorsevoı qatysty.
Rejısser Sergeı Dvorsevoıdiń sózinshe, «Aıka» fılmi alty jyl boıy túsirilgen. Fılm bıýdjeti 2,5 mln eýroǵa jete qabyl. Kartınanyń tolyq nusqasy bir aıdan keıin Reseı, Qazaqstan aýmaǵynda kórsetý josparlanyp otyr.
«Máskeýde 250-deı qyrǵyzstandyq áıel balalarynan bas tartyp, perzenthanada qaldyryp ketip jatqany týrasynda estip qaldym. Qazaqstanda týyp-ósken men úshin azıattyq áıelderdiń óz balasynan bas tartýy qatty tań qaldyrdy. Osy taqyrypty zertteı kele, kıno túsirgim keldi», dedi rejısser Sergeı Dvorsevoı. Onyń aıtýynsha, fılm ssenarıi Samaldyń yńǵaıyna qaraı ıkemdep jazylǵan. Fılmdi túsirý kezinde Samal qyrǵyz mádenıeti men tilin úırený úshin birneshe aı Qyrǵyzstanda turǵan.
Sergeı Dvorsevoıdyń aıtýynsha, fılmde balany emizetin sahnada dýblerdiń kómegine júginýge týra kelgen. «Sebebi balany kádimgideı emizý kerek edi. Osy sebepti dýblerdiń kómegin paıdalandyq. Qaqaǵan qysta jalańaıaq qardyń ústinde júrýge tózý ǵana kerek emes, sheber oınaýdy qajet etedi. Qalǵanyn Samaldyń ózi oınap shyqty. Jalpy, Samaldyń boıynda týa bitti qaısar minez jatyr, ishki qýaty myqty. Sol sebepti de basty rolge Samaldy tańdadym. Jańa bosanǵan áıeldiń qaıǵysyn óz boıynan ótkize otyryp, kelistirip oınap shyqty», degen rejısser fılmniń halyqaralyq marapatqa ıe bolýy qazaqstandyq kıno óneriniń damýyna kóptegen múmkindik ákeletinin aıtady.
Aıa О́MIRTAI,
Sýretti túsirgen Erlan OMAROV,
«Egemen Qazaqstan»