Qyzylordadaǵy Kásipkerler palatasynda oblystyq mamandandyrylǵan ekonomıkalyq sotynyń sýdıalary Saltanat Omarserikova, Záýre Jarylqasynova jáne Nurlan Elamanov kásipkerlermen kezdesti dep habarlaıdy «Egemen.Kz» tilshisi.
Onda memlekettik satyp alý tóńiregindegi ister, sot aldy kelisimge kelý jáne korporatıvtik daýlar máselelerine qatysty túsindirme jumystary júrgizildi
Atap aıtsaq, ótken jyly sotqa 3507 talap aryz tússe, onyń 1509-y memlekettik satyp alý salasyna qatysty. Bıylǵy jyldyń ózinde sotta memlekettik satyp alý máselesine qatysty 372 is tirkelgen.
- Qazir bizge kásipkerlerdi josyqsyz dep taný týraly kóptegen ister túsip jatyr. Jeke kásipker ma, jaýapkershiligi shekteýli seriktestik pe oǵan qaramaıdy, eger josyqsyz qatysýshy dep tanylsa «qara tizimge» kirip, 2 jyl kóleminde memlekettik satyp alý prosesterine qatysa almaıdy. Osy jaǵyn biz kásipkerlerge keńinen túsindirýimiz qajet. Aldynda qandaı táýekelder kútip turǵanyn isker azamattar bilýi kerek. Sondyqtan da memlekettik satyp alý prosesterine qatysqanda aldaryna qoıylǵan mindettemelermen muqııat tanysqany durys bolar edi. Josyqsyzdyqtyń aldyn alý úshin kelisimge kelý sharasyn qoldanǵany jón bolady, - deıdi sýdıa Saltanat Omarserikova.
Kásipkerler palatasy dırektorynyń quqyqtyq máseleler jónindegi orynbasary Ǵalym Edigeev jańadan ashylatyn sotsyz tatýlasý ortalyǵy aldaǵy ýaqytta memlekettik organ men kásipkerlerdiń arasyndaǵy máselelerdi bitimgershilik arqyly sheshýge múmkindik beretin tetik qabyldasa biraz máseleniń oń sheshilýine yqpal eter edi degen usynysyn bildirdi.
Kásipkerlerge kedergi az bolýy kerek. Áıtpese, tynysy tartylyp, jumysyna toqtaý bolady. Toqtaý bolýdyń aıaǵy bıýdjetke qarjy túspeıdi. Sotsyz tatýlasýdyń mánisi osy.
Baqtııar TAIJAN,
«Egemen Qazaqstan»
Qyzylorda oblysy