«Balam bıyl birinshi maýsymda altyǵa tolady. Biraq ony óz qolyma alyp, ári qaraı tárbıeleýge daıyn emespin» dep opynǵandaı kúı tanytty ol. Alaıda bezbúırek júzinen, meıirimsiz janardan, jasandy keıipten jylylyqtyń, analyqtyń izin kóre almadym. Jasy otyzdy eńsergen boıjetkenniń áldeqashan otbasyn baýyryna basyp otyratyn kezi-aý, átteń-aı degennen basqa amal bar ma?..
Bul talaılardy armanynan adastyrǵan úlken qala. Qarlyǵa da qyzyq qýyp júrip, ot basqan jandardyń biri. О́negeli otbasynda ósti. Mektepte jaqsy oqydy. Qyzdar oqıtyn joǵary oqý ornyna tústi. Biraq bilimin aıaǵyna deıin jalǵastyra almady. Áldebir jylpyldaq jigittiń «Jaqsy kórem, úılenemiz» degen sózine aldandy. Aqyrynda oqýyn tastap, qala ortalyǵynan jyraqtaý mańda turyp jatqan tanys qurbylarynyń páterine baryp tyǵyldy. Habarlasqan ata-anasyn, týystaryn aldap kún keship jatty. Al myna ómirge yntyqqan tirshilik ıesi jaryq dúnıe esigin ashpaqqa asyǵys edi. Búıiri bultıǵan saıyn shúberekpen shart baılap, ony tumshalap tastaǵandaı bolady. Alaıda jatyrda jatyp jaryq dúnıege umtylǵan sharanaǵa eshqandaı kederginiń áseri bolmady. Tań atpaıyn dese de kún qoımaıdy. Ol kún sanap óse berdi.
Al shermende qyz úshin shahar qansha úlken bolǵanymen onyń turǵyndary da bir-birin tanıtyn sııaqty kórinetindeı. Jańalyqtyń da qulaqtan-qulaqqa jyldam jetýi zańdylyq...
Aqyry ony ápkesi izdep tapty. Áke-sheshesine aıtpaýyn ótingen qyz onyń aıaǵyna jyǵyldy. Ol da tezdete baladan qutylýǵa asyqty. Elge qarabet bolǵansha oǵan ólim tilegen ápkesi de osy tirligimen sińilisin azaptan aman alyp qalamyn dedi me, sábıden qutylýdyń barlyq jolyn izdedi. О́zi sheshim qabyldap, dereý iske kiristi.
Sol kún ápkesi úshin aspan aınalyp jerge túskendeı alashapqynmen ótti. Pora-pora ter basqan jalǵyz janashyry perzenthananyń tabaldyryǵyn tozdyryp boldy. Áldeqashan amalyn oılastyryp, sińlisiniń bul jerden soqa basyn alyp shyqpaqqa ábden bel býǵan. «Súıinshi» surap júgirgen medbıke onyń túnergen túrip kórip sostıyp turyp qaldy da: «Men habarlaýǵa mindettimin, nemereńiz – ul bala, salmaǵy – 3200, boıy – 51», dedi de jalt burylyp joq boldy. «Raqmet». Osy sózden basqa aıtaryn ishine búkken onyń bezbúırek sıqy betine shyqty. Az shydasa bir-eki kúnde bul sharýa da umyt bolar.
Úlken bir taǵdyrdyń shaǵyn uzyn-yrǵasy mine, osyndaı. Odan beri de alty jyl alty kúndeı de bolmaı, syrǵyp óte shyǵypty. Osy jyldarda anasy sábı kúlkisinen ada kókektiń kúıin keshse, meıirimge zaryqqan sábı ana alaqanynan jyraqta ósip jatyr.
Men ol qyzdy jıi kezdestiremin. Symbatty, ádemi jasanǵan boıjetken jıi issaparǵa ketip bara jatady. Ony tasıtyn qymbat kólikter de jıi aýysyp turady. О́ziniń aıtýynsha, jumysy – «massajıst». Shetelderge shyǵyp, bilimin jetildirip júrgen de syńaıly.
Al tastandy sábıdiń taǵdyry beımálim. Qaladaǵy jetimder úıiniń birinde me, álde bala súıgisi kelgen otbasynyń qamqorlyǵyna alyndy ma, ol jaǵy áli eshkimdi tolǵandyra qoıǵan joq. Al shermende balapan sheshesin ańsaýmen kúnderi ótip jatqan shyǵar...
Mıra SEKEN
ALMATY