«Astana» qarjy ortalyǵy – Qazaqstandaǵy jekeshelendirýdiń negizgi operatory bolmaq. Bul týraly Peterbýrg halyqaralyq ekonomıkalyq forýmy aıasynda ótken «Qazaqstannyń ınvestısııalyq múmkindikteri» atty sessııasynda QR Premer-Mınıstriniń birinshi orynbasary Asqar Mamın aıtty.
– «Astana» qarjy ortalyǵy Sıngapýr, Nıý-Iork, London, Dýbaı syndy qarjy ortalyqtarynyń tájirbıesin negizge ala otyryp jumys jasaıdy. halyqaralyq táýelsiz sot júıesi ınvestorlardyń quqyǵyn qorǵap, aqparattyń ashyqtyǵyn, ádil sheshimderdiń qabyldanýyn qamtemasyz etedi. Aǵylshyn quqyǵymen jáne táýelsiz sottarmen jumys isteıtin «Astana» halyqaralyq qarjy ortalyǵy EKSPO-2017 qalashyǵynda ornalasqan. Atalǵan ortalyqtyń aǵymdaǵy jylǵy 5 shildede ótetin resmı tusaýkeserine shaqyramyn, – dedi Asqar Mamın.
Sondaı-aq jıynda sóz alǵan «Astana» HQO Basqarýshysy Qaırat Kelimbetov eldegi asa mańyzdy baǵdarlamalardyń biri – jekeshelendirý Memleket basshysynnyń «100 naqty qadam» jáne 5 ınstıtýsıonaldyq reformaǵa sáıkes ekonomıkany ártaraptandyrý baǵyty boıynsha júzege asyp otyrǵanyn aıtty.
– Aýqymdy baǵdarlamanyń aıasynda aldaǵy 3-5 jylda IPO-ǵa kiretin «QazMunaıGaz», «Qazaqstan temir joly», «Qazaqtelekom», «Qazatomprom» jekeshelendirýge shyǵady. Bulardyń barlyǵy IJО́-niń 40 paıyzyn quraıtyndyǵyn da aıta ketken jón. Bul qadam Qazaqstandaǵy korporatıvtik basqarý júıesiniń jandanýyna jáne de ınvestorlar tartýǵa múmkindik beredi. Elde sońǵy jyldary ınvestısııa tartý úshin ınvestorlarǵa zań aıasynda jeńildikter qarastyrylyp otyr, - dedi Q. Kelimbetov.
Arnur Asqar,
«Egemen Qazaqstan»