Aqmola oblysynda A.I.Baraev atyndaǵy astyq sharýashylyǵy ǵylymı-óndiristik ortalyǵynda eginshilik polıgony jumys isteı bastady. Bul týraly Ortalyq kommýnıkasııalar qyzmetinde ótken brıfıng barysynda ǵylymı-óndiristik ortalyqtyń bas dırektory Kenje Abdýllaev málimdedi.
Bul aýqymdy joba Ulttyq bıotehnologııa ortalyǵynyń ǵalymdary men aldyńǵy qatarly aýylsharýashylyq kásiporyndary jáne oblys ákimdigi ókilderi engen ǵylymı-óndiristik keńestiń birlese atqarǵan jumysy nátıjesinde júzege asyp otyr. Joba maqsaty – agrosenozdy basqarý men monıtorıng negizinde eginshiliktiń naqty tehnologııalaryn beıimdeý jáne transfert jasaý. Sondaı-aq aýyl sharýashylyǵynyń ónimdiligin arttyryp, shyǵyndardy azaıtý.
Eginshilik polıgonynyń aýmaǵy 3 myń gektardy alyp jatyr. Jańa tehnologııany qoldanýdyń nátıjesinde egin egý men astyqty jınaýdyń ońtaıly ýaqytyn boljaýdyń, «aqyldy sýarýdyń», mıneraldy tyńaıtqyshty sebýdiń, zııankester men aramshópke qarsy kúresýdiń ıntellektýaldy júıelerin paıdalana otyryp eńbek ónimdiligin birneshe esege deıin arttyrýǵa bolady eken. Al júrgizýshisi joq tehnıka adamı faktordy azaıtyp, astyqtyń ózindik qunyn tómendetýge múmkindik bermek. Brıfıng barysynda K.Abdýllaev jobany júzege asyrý astyq ónimdiligin gektaryna 25 sentnerge, al eńbek ónimdiligin 2-2,5 ese arttyrýǵa múmkindik beretinin jetkizdi.
Venera TÚGELBAI, «Egemen Qazaqstan»