Mine, taǵy bir oqý jyly aıaqtalyp, sońǵy qońyraý úni de syńǵyrlady. Sońǵy qońyraý úniniń ózindik syry bar. Bul – balalyq baldáýrenniń bir belesi. Endi az kem kúnnen soń emtıhan naýqany aıaqtalyp, muǵalimder men oqýshylardyń asyǵa kútken jazǵy demalysy da bastalady. Qolyń jetse, jazǵy lagerde jańa dostar tapsań da, aýylda ata-ájeńniń janyna baryp asyr salsań da, alysqa uzamaı ata-anańa qolǵabys etseń de aıryqsha qýanysh. Áne, demalys dep sony aıt! Al bıyl orta bilim alyp shyqqan 147 myń mektep bitirýshi úlken ómirge qadam basty. Olardyń armany bıik, kóńili alań. О́ıtkeni qorytyndy attestattaý, odan keıin ulttyq biryńǵaı testileý hám mamandyq tańdaý sııaqty jaýapty kezeń kútip tur. Sondaı-aq kategorııasyn kóterýdi qalaǵan muǵalimder de jańa formattaǵy biliktilik testileýinen ótedi.
25 mamyrda barlyq mektepte saltanatty jıyn ótip, oqý jylyn qortyndylady. Bıyl 7 myńǵa jýyq túlek «Altyn belgige» úmitker atandy. Aıta ketken lázim, aǵymdaǵy jyly «Altyn belgi» ıegerlerine UBT kezinde jınaǵan baly teń bolǵan jaǵdaıda ǵana basymdyq beriledi. Al aldaǵy UBT synaǵyna 102 442 mektep bitirýshi qatysýǵa nıet etip otyr. Olardyń 75 paıyzy testileýdi qazaq tilinde, al 25 paıyzy orys tilinde tapsyrmaq. Ulttyq testileý ortalyǵynyń dırektory Ramazan Álimqulovtyń aıtýynsha, búginde 1,5 myń aýdıtorııa UBT tapsyrý naýqanyn ótkizýge ázirlenýde. Onyń ishinde 500-den asa aýdıtorııa áli de mobıldi baılanysty shekteıtin qurylǵylarmen jabdyqtalmaǵan eken. Osy oraıda Bilim jáne ǵylym mınıstri Erlan Saǵadıev jergilikti ákimdikterdi UBT ótkizý pýnkterin metall izdeýishtermen, kameralarmen jáne baılanysty shekteıtin qurylǵylarmen jabdyqtaýǵa shaqyrǵan bolatyn.
Árıne, mektep bitirýshilerdiń keshi de, túlekterdiń tań shapaǵyn qarsy alýy da ata-analardy, oqýshylar men muǵalimderdi ájeptáýir ábigerge salǵanymen áp-sátte óte shyǵady. Eń bastysy, aıaýly altyn uıadan qanattanyp shyqqan jas túlektiń ómirdiń óz qazanynda qaınap, el men jerge qyzmet eter tas túlekke aınalýy bolsa kerek!
Abaı hákim aıtqandaı, «Sen de bir kirpish dúnıege, ketigin tap ta, bar, qalan!..»
Dýman ANASh,
«Egemen Qazaqstan»