2017-2018 oqý jylynda Atyraý oblysynda 5183 oqýshy mektep bitirdi. Onyń 153-i «Altyn belgige», 91- i úzdik attestatqa úmitkerler.
Atyraý oblysynyń ákimi Nurlan Noǵaev «Bilim-Innovasııa» Atyraý oblystyq lıseı-ınternatyn bitirýshilerdiń sońǵy qońyraý saltanatyna qatysty. Bıylǵy jyly 1993 jyly ashylǵan Atyraý oblystyq lıseı-ınternatyna 25 jyl tolady.
Aıtýly kúndi merekeleý 49 túlek bitirip otyrǵan lıseıdegi oqý jylynyń aıaqtalýymen tustas keldi.
Lıseı dırektorynyń orynbasary Nurbek Amanovtyń aıtýynsha 2017-2018 oqý jyly oqý orny úshin jaqsy kórsetkishtermen aıaqtaldy.
- Osy oqý jylynyń túlekteri oblystyq olımpıadalarda 45 júldeli oryndardy ıelendi. Respýblıkalyq deńgeıde 12 oqýshy túrli jarystar men olımpıadalarda júldeli oryndar aldy. Halyqaralyq deńgeıde 15 oqýshy bilim berý konkýrstarynyń júldegerleri atandy, -dedi dırektordyń oqý bólimi jónindegi orynbasary Nurbek Amanov.
Lıseıdiń úsh bitirýshisi Gonkong jáne Kanadanyń ýnıversıtetterine oqýǵa tústi. 12 túlek Nazarbaev ýnıversıtetine tikeleı grant aldy. Sońǵy qońyraý saltanatyna Atyraý oblysynyń ákimi Nurlan Noǵaev qatysty.
- Memleket basshysy óz sózderinde jastarymyz álemdik arenada básekege qabiletti bolýy qajettigin jıi aıtyp keledi. Munyń negizgi krıterııleriniń biri – sapaly bilim alý. Búgingi kúni oblys mektepterinde bul úshin barlyq jaǵdaı jasalǵan. Biz mektepterdiń sanyn kóbeıtýdemiz, oqý oryndarynyń materıaldyq-tehnıkalyq bazasyn jaqsartýdamyz. Osy sátti paıdalana otyryp, aǵymdaǵy oqý jylyn bitirýshilerdi quttyqtaımyn, olarǵa jetistikter, bilimge degen qushtarlyq pen jeńister tileımin, - dedi oqýshylarǵa arnap sóılegen sózinde Nurlan Noǵaev.