Selınograd aýdanyndaǵy Qabanbaı batyr jáne Qosshy aýyldarynda zamanaýı balalar baqshasy ashyldy. Osy ıgi sharalardyń ashylý saltanatyna qatysqan oblys ákimi Sergeı Dıachenko jurtshylyqty qýanyshqa bólegen nysandar Elbasynyń Astanaǵa irgeles eldi mekenderdi damytý jónindegi keshendi baǵdarlamasyna saı salynǵandyǵyn atap ótti.
Qabanbaı batyr aýyly turǵyndarynyń suranysyn tolyq qamtamasyz etetin 320 oryndyq «Balaýsa» balǵyndar uıasy respýblıkalyq bıýdjet qarjysymen boı kóterdi. Munda árqaısysynda 20 baladan jınaqtalǵan 16 top qazaq jáne orys tilderinde tálim alatyn bolady. Sondaı-aq, jańa nysannyń paıdalanýǵa berilýimen 70 jumys orny qurylyp otyrǵany da mańyzdy.
Qabanbaılyqtar barlyq qolaılylyq qarastyrylǵan balabaqshany Táýelsizdik meıramy qarsańynda tartý etken Temir Dáýletov jetekshiligindegi «TMZ» JShS ujymyna alǵystaryn jaýdyrdy.
Qosshy aýylynyń turǵyndary da «Bıznestiń áleýmettik jaýapkershiligi» qozǵalysynyń syılyǵyna rıza kóńilderin bildirdi. Jergilikti kásipker Esmaǵzam Qojahmetov aýmaǵy 400 sharshy metrlik kottedj úlgisindegi ásem «Ámına» balabaqshasyn óz qarajatyna turǵyzdy. Jekemenshik baqsha jıyrma adamdy jumyspen qamtyp otyr.
Baqbergen AMALBEK.
Aqmola oblysy.