Úmit toly janar... Lúpil qaqqan júrek... Qııal qanatynda qalyqtaǵan arman... «Jas qanat» baıqaýyna qatysýshy ónerpazdardyń barlyǵyn ortaqtastyratyn sezim bul! Bes kún boıy bir qorqynysh, bir úmit, bir qýanysh, bir kúdik judyryqtaı júrekterin tynym tapqyzbaı, myń márte tolqytqan aıtýly án baıqaýy keshe óz máresine jetti. Astanadaǵy Beıbitshilik jáne kelisim saraıynda ótken shyn júırik anyqtalǵan saltanatty jıynda Qazaq eli «Jas qanat-2018» jas oryndaýshylardyń XXVII respýblıkalyq baıqaýynyń kezekti jeńimpazymen tanysty.
1991 jyldyń kókteminen beri jyl saıyn úzdiksiz uıymdastyrylyp kele jatqan baıqaý óziniń 27 jyldyq tarıhynda jas ánshilerdiń tutas tolqynyn tárbıelep shyǵardy. Talaı talanttyń baǵyn ashyp, ónerdegi baǵytyn aıqyndady. «Jas qanattan» túlep ushqan Medeý Arynbaev, Erlan Kókeev, Nurlan Abdýllın, Baqyt Shadaeva, Janar Duǵalova, Mádına Sádýaqasova, Marjan Arapbaeva, Dımash Qudaıbergen bastaǵan talanttar shoǵyry búginde otandyq án óneriniń maqtanyshy.
Elimizdegi erekshe tanymaldyqqa ıe, aıtýly mýzykalyq joba Beıbitshilik jáne kelisim saraıynyń kıeli sahnasynda mamyrdyń 25-i men 27-si aralyǵynda ótti. Bıyl «Jas qanatqa» respýblıkanyń túkpir-túkpirinen 12 úmitker iriktelip alyndy. Olardyń arasynda Astana, Taraz, Qaraǵandy, Almaty, Petropavl, Oral qalalarynyń jáne Aqtóbe oblysynyń namysyn qorǵaıtyn ónerpazdar bar. Atap aıtsaq, Armanaı Ábdimomynova (Qaraǵandy), Baqtııar Aqylbek (Astana), Nuraı Ǵanıqyzy (Taraz), Dıas Kárimjanov (Astana), Nurdáýlet Qýandyquly (Aqtóbe), Rıza Maǵzum (Oral), Dámel Ortamysheva (Petropavl), Zamıra Saǵadıeva (Astana), Symbat Seıilhanova (Almaty), Janbolat Talasbaı (Taraz), Aıan Tasyrov (Almaty), Sáýle Tynyshtyqova (Taraz) baıqaýdyń negizgi júldesi – «Altyn qanattyń» ıesi bolýǵa baryn salyp baqty. 3 saıystyq kezeń boıynsha óner kórsetken qatysýshylar kásibı mýzyka mamandarynyń baǵasymen qatar shyǵarmashylyq úlken tájirıbe mektebinen ótti.
«Jas qanat-2018» baıqaýy tek qatysýshylar úshin ǵana emes, qazylar úshin de jaýapty sát boldy. Sebebi estrada aspanynda jańa juldyzdyń jaǵylyp, jas oryndaýshynyń úlken sahnadaǵy alǵashqy qadamyna tórelik aıtý – tarıhı hám jaýapty qadam. О́zderine júktelgen salmaǵy zil batpan senimdi abyroımen alyp shyǵýdy kózdegen sarapshylar barynsha ádiletti bolý úshin baryn saldy.
«Jas qanattyń» bıylǵy XXVII maýsymyna jobanyń tól perzentteri, ıaǵnı «Jas qanattyń» ár jyldardaǵy laýreattary men dıplomanttary qazylyq etti. Olar – Marjan Arapbaeva, Medeý Arynbaev, Nurlan Abdýllın, Baqyt Shadaeva. Sondaı-aq «Astana Opera» teatrynyń dırıjeri Abzal Muhıtdınov, professor Raısa Musahodjaeva, «Astana Opera» teatrynyń bas hormeısteri Erjan Dáýitov, Kazakh-TV telearnasynyń dırektory Sandýǵash Rahımjanova jáne baıqaýdyń negizin qalaýshy, prodıýser Murat Erǵalıev te baıqaý myqtylaryna óz tóreligin aıtty.
– «Jas qanat» jyldan jylǵa jasaryp bara jatyr. Nebári 16-17 jastaǵy qatysýshylar joǵary deńgeıde óner kórsetýde. Jastyǵyna qaramastan boılarynda ánshige kerek barlyq qasıet toǵysqan: júrek te, daryn da, talap ta, talǵam da bar. Biz osy balalardaı kezimizde úlken sahnaǵa shyǵyp, baq synamaq turmaq, áli kórkemónerpazdar úıirmesinen de uzaı qoımap edik. Búgingi jastar shynymen de baqytty», – dep «Jas qanattyń» eń alǵashqy túlegi, belgili ánshi Medeý Arynbaev baıqaýdan alǵan áserimen bólisti.
Hosh! Sonymen kópten kútken tarıhı sátke de kelip jettik. Qazylar alqasynyń sheshimimen aqtyq synǵa 3 úmitker tańdaldy. «Júzden júırik, myńnan tulpar» shyqqan ónerpazdar kásibı oryndaý sheberligi men upaı sanyna baılanysty I, II jáne III oryndy ózara bólisti. Baıqaý qorytyndysy boıynsha, qazylar alqasynyń biraýyzdan qoldaýymen «Jas qanattyń» bas júldesi – «Altyn qanat» júldesine Baqtııar Aqylbek (Astana) laıyq dep tanyldy. «Kúmis qanatty» Zamıra Saǵadıeva (Astana) enshilese, Armanaı Ábdimomynova (Qaraǵandy) «Qola qanattyń» ıegeri atandy.
Sondaı-aq «Jas qanat» baǵdarlamasynda osymen úshinshi jyl «Armanǵa bir qadam» atty «baıqaý ishinde baıqaý» ótip keledi. Ereje boıynsha arnaıy jobadaǵy úmitkerlerdiń arasynan qazylar alqasy «Jas qanat-2019» baıqaýyna irikteýsiz ótetin bir oryndaýshyny tańdap alýy kerek edi. Biraq bıyl «Jas qanat» baıqaýynyń tarıhynda tuńǵysh ret qatysqan úsh ónerpazdyń úsheýi de kelesi jylǵa joldama aldy. Olar: Toǵjan Qalı (Astana), О́rken Mırov (Qaraǵandy) jáne Aqbota Qusnadın (Astana). Bul ónerpazdar kelesi jyly dál osy ýaqytta ótetin «Jas qanat-2019» baıqaýyna irikteýsiz qatysady.
О́ner baıqaýy úshin 27 jyl – az ýaqyt emes. Osy ýaqyt aralyǵynda «Jas qanat» óz dástúri men talǵamyn qalyptastyryp úlgerdi. Onyń ıgi mysaly – baıqaýǵa qatysýshylar jyl saıyn jasqanattyq dástúr boıynsha «Jas qanat» alleıasynda estelik aǵashtaryn otyrǵyzdy. Aǵash tamyrymen birge asyl armandary jazylǵan úshbý hatty da topyraqpen birge kómedi. Sol arqyly bolashaq óner adamy júreginiń túkpirinde eshkimge aıtpaı aıalap kelgen aıaýly armanyn syrtqa shyǵarýǵa múmkindik alady. Bul dástúr «Jas qanatpen» birge jasap, áýeldegi 2-3 tal aǵash búginde máýeli ormanǵa aınalyp úlgerdi. Birneshe býyn qatysýshylarynyń bar arman-tilegi men syryn «Jas qanat» alleıasynyń máýeli aǵashtary jyldan-jylǵa aman jetkizip, saqtap keledi...
Nazerke JUMABAI, «Egemen Qazaqstan»