Biryńǵaı jınaqtaýshy zeınetaqy qory tanymal Telegram messendjeri úshin óziniń botyn iske qosty. Paıdalanýshylar jańa qyzmettiń kómegimen qysqa úzindi-kóshirme alý nemese úzindi-kóshirmeni elektrondyq poshtasyna jiberý, Jeke kabınetke kirý parolin qaıta qalpyna keltirý, Qordyń mańyzdy jańalyqtary men aǵymdaǵy kórsetkishterimen tanysý jáne onyń eń jaqyn bólimshesin tabý múmkindigine ıe bolady.
Odan basqa, bot negizgi valıýtalardyń (AQSh dollary, eýro, rýbl) aǵymdaǵy baǵamyn habarlaıdy, sonymen qatar jol qozǵalysy erejesiniń buzylýyna qatysty aıyppuldyń bar-joǵyn tekserip, BJZQ uıaly qosymshasyn júkteýge silteme jasaıdy. Aldaǵy ýaqytta bottyń kórsetetin qyzmetin keńeıtip, barynsha paıdaly jáne yńǵaıly etý josparlanýda.
Atalǵan qyzmetterdi paıdalaný úshin botty messendjerge qosý kerek. Bul úshin izdeý jolaǵyna «enpfbot» ataýy engiziledi. Alǵash iske qosqanda paıdalanýshylarǵa qyzmet kórsetý tili retinde memlekettik nemese orys tilin tańdaý usynylady. Keıin ony negizgi mázirde aýystyrýǵa bolady.
Eske sala ketý kerek, ótken jyldyń sáýir aıynda Qor Telegram messendjerinde resmı @enpfkz arnasyn iske qosqan-dy. Oǵan jazylǵan paıdalanýshy Qazaqstan Respýblıkasynyń jınaqtaýshy zeınetaqy júıesi men BJZQ qyzmeti týraly mańyzdy aqparattar ala alady.
Aınash ESALI,
«Egemen Qazaqstan».
ALMATY