Memleket basshysy, «NurOtan» partııasynyń tóraǵasy Nursultan Nazarbaev bıylǵy Qazaqstan halqyna Joldaýynda qoıǵan basty talaptardyń biri – sıfrlandyrý ekeni belgili. Teatr kıim ilgishten bastalsa, tutastaı elimizdegi óndiristik qurylymdar men áleýmettik salalardy jáne bilim berý mekemelerin jappaı sıfrlandyrý isi alǵashqy kezekte sıfrlyq saýattandyrý deńgeıin kóterýden bastalmaq. Bul mindetter eń aldymen respýblıka mektepterinde IT klass jobalaryn júzege asyrýdan bastaý alady.
Búgingi qoǵamdyq ómirdiń osyndaı zamanaýı talabynan týyndaǵan másele respýblıka óńirleri arasynda Aqtóbe óńirinde keńinen qanat jaıyp otyr. Osy oraıda óńirde alǵashqy IT klastardyń biri Úsh tilde oqytatyn №21 orta mektep – gımnazııasynda ashyldy.
IT klastardy jobalaý sheńberinde programmalaý, nemese programmalaý tilin úıretý degen uǵym bar. Muny respýblıka mektepterinde jappaı oqytý baǵdarlamasyna engizilgen ınformatıka pániniń atqaratyn qyzmetimen shatastyrmaǵan jón. О́ıtkeni bul múldem jańasha túsinik. Mundaǵy birinshi mindet jas jetkinshekterdi programmalaý tiline jattyqtyrý bolsa, ekinshiden IT klastar robotty tehnıkamen jumys isteý daǵdylaryn da berik ornyqtyrýǵa negiz qalaı alady. Munyń arǵy jaǵynda oqýshylardyń kúrdeli tehnıkalyq qurylymdardy tájirıbelik túrde óz qolymen qurý isin meńgerýi degen mándi de mańyzdy másele bar. Bul birinshiden jaratylystaný ǵylymdary ilimderine, sondaı-aq fızıka-matematıka pánderine arqa súıeıdi,- dedi gazet tilshisine joǵaryda atalǵan Aqtóbe qalasyndaǵy mektep – gımnazııanyń dırektory Marjankúl Toıshymanova.
Mundaǵy ashylǵan IT klastar sońǵy úlgidegi kompıýterlermen jáne 3D prınterlermen, joǵary jyldamdyqtaǵy ınternetpen, sonymen birge qajetti veb-baǵdarlamalarmen jabdyqtalǵan. Zamanaýı jobanyń júzege asýyna «NurOtan» partııasy bastamashy bolyp otyr. Atap aıtqanda «NurOtan» partııasy Aqtóbe qalalyq fılıaly tóraǵasynyń birinshi orynbasary Muratbaı Ájibaevtyń aıtýy boıynsha bıyl partııalyq joba aıasynda óńirdegi 20 joǵary bilim beretin mektepterde IT klastar ashylmaq. Onyń deni bıylǵy jyldyń ekinshi jarty jyldyǵyna deıin iske qosylady dep kútilýde.
IT klastardy jobalaý birinishi kezekte qarjylandyrý máselesin ońtaıly túrde sheshý qajettiligin týyndatady. Osy oraıda árbir IT klastardy jasaqtaý úshin tórt mıllıon tenge qajet ekendigin aıtqan jón. Bul rette Aqtóbe óńirinde jergilikti bıýdjetke salmaq sala bermeı, ony bilim berý isiniń janashyrlary, kásipkerler jáne úkimettik emes uıymdar qarajattary esebinen sheshý kózdelgen. Sóz sońynda oblystyq jáne qalalyq «NurOtan» partııasy fılıaldary qoldaýymen qolǵa alynǵan IT klastar ashý máselesi oblysta ilkimdi túrde júzege asa bastaǵanyn aıtqan jón.
Temir Qusaıyn,
«Egemen Qazaqstan»
AQTО́BE