Jobanyń birinshi maýsymynda kóptiń súıispenshiligine bólenip, álemniń alty elinde taratylǵan, 200 mıllıonnan asa adam tamashalaǵan úlken joba jalǵasyn tabady. Búgin Almatydaǵy Qazaqstan Baspasóz klýbynda «31-arnadaǵy» «I`m a singer Kazakhstan» halyqaralyq talant-shoýynyń ekinshi maýsymynyń iske qosylýyna baılanysty BAQ ókilderin jınady.
Baspasóz májilisinde 31-arnadaǵy «I`m a singer Kazakhstan» halyqaralyq talant-shoýynyń ekinshi maýsymyna daıyndyǵy jaıynda jańalyqtarymen bólisip, jobaǵa qatysý úshin resmı kastıngtiń bastalǵanyn habarlady.
Osylaısha «31-arna» «I`m a singer Kazakhstan» halyqaralyq talant-shoýynyń ekinshi maýsymy bastaldy. Bıyl baıqaýdyń júlde qory 50 000 000 teńgeni quramaq! Keńestik kezeńnen keıingi aımaqta teńdesi joq bul erenjoba burynǵysynsha búkil álemniń eń myqty kásibı ánshilerin óz alańynda jınaıtyn bolady.
Bıyl baıqaý tóreshileriniń quramyna shynynda da naǵyz juldyzdar qosylmaq.
«I`m a singer Kazakhstan» shoýy qamtyǵan aýmaǵy men aýqymy, uıymdastyrylýy, ótkizý sapasyna qoıylǵan joǵary standarttary jaǵynan qazaqstandyq naryqtyń aldyna bıik meje belgilep berdi. Reıtıngter kórsetip otyrǵandaı, shoý kórermenderdiń de, uıymdastyrýshylardyń da kóńilinen shyqty.
«Osy joba arqyly biz qazaqstandyq televızııany el aýmaǵynan tysqary aımaqtarǵa shyǵaryp, kórermenniń joǵary baǵasyna ıe boldyq, – dedi «31-arna» bas dırektory Baǵdat Qojahmetov. – Birinshi kezekte, biz árdaıym kórermenderimizdiń qyzyǵýshylyqtaryn eskerýge tyrysamyz. Birinshi maýsym qorytyndysy boıynsha júrgizilgen zertteý nátıjesinde shoý jankúıerleriniń kóńiline ne jaqyn ekenin anyqtadyq. Osy arqyly jańa maýsymda joba formatyn jetildirip, baıqaý jáne kórermenderdiń daýys berý tujyrymdamasyn ózgerttik. Shoýdy ótkizip, habar taratý úshin úlken shyǵarmashylyq jáne tehnıkalyq, adamı qorlar jumysqa tartylady. Biz biraz dúnıeni úırenip, jetilip, kórermenderimizdiń tilekterine qulaq saldyq. Demek, jańa maýsym budan da kóp qazaqstandyqtardy tańqaldyrady degen sóz. Intrıgany kútińiz, ol mindetti túrde bolady!».
«Júlde qory birinshi, ekinshi jáne úshinshi oryn arasynda úlestirilip, jalpy somasy 50 000 000 teńge quramaq. Bas jeńimpaz Almatyda jeke konsertin ótkizip, jańa ánin jazyp, beınebaıan túsirýge jáne ony qazaqstandyq radıostansııalarda, mýzyka telearnalarynda jyl boıy rotasııalaýǵa múmkindik alady», – deıdi shoý jańalyqtarymen bólisken baıqaý tóreshisi Sáken Maıǵazıev.
Aınash ESALI,
«Egemen Qazaqstan».
ALMATY