«Nur Otan» partııasy IT-mamandardy daıyndaý, bilim berý salasyn jetildire túsý maqsatynda jańa jobalardy qolǵa alǵany belgili. Atalǵan jobalar aıasynda aldaǵy úsh jylda elimizde jumys berýshi IT-kompanııalar men iri joǵary oqý oryndarynyń bazasynda 20 IT-ortalyq ashylyp, jylyna 35 myń adamǵa bilim berý josparlanǵan bolatyn.
Ońtústik Qazaqstan oblysy bilim basqarmasynyń málimetine sáıkes, 2018 jyly quny 4 mln 900 myń teńgeni quraıtyn, 3200 oqýshyny qamtıtyn 20 synyp, al 2019 jyly 8100 oqýshyny qamtıtyn 30 IT-synyp ashý josparlanýda. Ol synyptarda IT-ortalyqtarda bilimin jetildirgen muǵalimder sabaq beretin bolady.
Osy josparlar aıasynda jaqynda Shymkentte IT- ortalyq ashyldy. Azamattardyń sıfrlyq saýattylyqtaryn arttyrýǵa, bilim berý salasyn jetildirýge baǵyttalǵan IT- ortalyq «Nur Otan» partııasynyń «IT-mamandardy daıyndaý» jobasy sheńberinde iske asty. M.Áýezov atyndaǵy Ońtústik Qazaqstan memlekettik ýnıversıtetiniń bazasynda ornalasqan IT-ortalyq zamanaýı 16 kompıýter, joǵary jyldamdyqtaǵy ınternet, qajetti veb-baǵdarlamalarmen jabdyqtalǵan.
– Bul ortalyqta IT salasyna qatysty qajetti aqparattar, túrli qyzmetter usynylyp, mamandar oqytylatyn bolady. Bul óz kezeginde halyqtyń sıfrlyq saýattylyǵyn arttyrady, – deıdi oblys ákiminiń orynbasary T.Sársembaev.
Ǵalymjan ELShIBAI, «Egemen Qazaqstan»