Aqtóbede qalanyń 149 jyldyq mereıtoıyna arnalǵan jeńil atletıkadan jyl saıynǵy «CNPC-Aktobe Marathon» jartylaı marafony ótti dep habarlaıdy Aqtóbe oblysy ákiminiń baspasóz qyzmeti.
Bul sharanyń maqsaty - buqaralyq sportty damytý jáne halyq arasynda salaýatty ómir saltyn nasıhattaý. Dástúrli sporttyq jarystar tek qana Aqtóbe turǵyndarynyń arasynda ǵana tanymal emes ekenin aıta ketý kerek. Bıylǵy jyly qatysýǵa ótinimder Almaty, Astana, Atyraý, Oral, Aqtaý, sondaı-aq oblystyń aýdandarynan da boldy.
Oblys ákimi Berdibek Saparbaev sporttyq jarystyń qatysýshylaryn quttyqtap, salaýatty ómir saltyn nasıhattaýǵa shaqyrdy.
- Memleket basshysy árbir qazaqstandyqtyń sportpen shuǵyldanýy, salaýatty ómir saltyn ustanýy kerek degen mindet qoıǵan bolatyn, sebebi kez kelgen eldiń bolashaǵy óz azamattarynyń densaýlyǵyna baılanysty. Biz, óz kezegimizde, Prezıdenttiń tapsyrmasyn oryndaý úshin barlyq qajetti jaǵdaılardy jasaımyz. Árqaısymyz úshin densaýlyǵymyz myqty bolýy mańyzdy, bizdiń densaýlyǵymyz eń aldymen ózimizge baılanysty. Salaýatty ómir súrý jáne uzaq ýaqyt boıy ómir súrý úshin árqashan qozǵalysta bolýǵa, sportpen shuǵyldanýǵa tıispiz, - dedi oblys basshysy.
3, 10 jáne 21 shaqyrymdyq júgirýge 5 myńnan astam adam qatysty. 10 jáne 21 km aralyǵyndaǵy barlyq qatysýshylar medaldarmen marapattaldy. Jeńimpazdar 50-den 250 myń teńgege deıingi somaǵa sertıfıkattarmen marapattaldy. 10 shaqyrymdyq jarystyń eń jas qatysýshysy 13 jasar Aısýlý Ýtesın bolsa, eń úlkeni 78 jastaǵy Tóleý Orynbaev boldy. Olar da estelik syılyqtarmen marapattaldy.