Qazaq memlekettik qyzdar pedagogıkalyq ýnıversıtetinde «Jańa gýmanıtarlyq bilim. Qazaq tilindegi 100 jańa oqýlyq» jobasyn talqylaýǵa arnalǵan jıyn ótti.
Alqaly basqosýdy kitaphana dırektory Baqytjamal Baǵasharova ashyp, Memleket basshysynyń «Bolashaqqa baǵdar: rýhanı jańǵyrý» maqalasyn júzege asyrý maqsatynda qolǵa alynǵan ıgilikti istiń mańyzyn áńgimeledi.
– Elbasynyń baǵdarlamalyq maqalasynda «Biz aldaǵy birneshe jylda gýmanıtarlyq bilimniń barlyq baǵyty boıynsha álemdegi eń jaqsy 100 oqýlyqty ártúrli tilderden qazaq tiline aýdaryp, jastarǵa dúnıejúzindegi tańdaýly úlgilerdiń negizinde bilim alýǵa múmkindik jasaımyz. 2018-2019 oqý jylynyń ózinde stýdentterdi osy oqýlyqtarmen oqyta bastaýǵa tıispiz» degen edi. Qoǵamdyq jáne gýmanıtarlyq ǵylymdar boıynsha 100 jańa oqýlyqty aýdarýǵa jańadan qurylǵan Ulttyq aýdarma bıýrosy kirisip ketti. Jańa oqýlyqtar – eksklıýzıvti gýmanıtarlyq kitaphana. Bul oqýlyqtar kópshilik úshin kitap túrinde, elektrondyq onlaın nusqasynda jáne úzdik lektorlardyń ashyq dáristeriniń vıdeotekasy sııaqty úsh formatta qol jetimdi bolmaq. Kitaptar latyn qarpinde basyp shyǵarylǵannan keıin, olardy shetelde turatyn jastarymyz da oqı alatyn bolady, – dep atap ótti B. Baǵasharova.
Al, Qyzdar Ýnıversıtetiniń «Rýhanı jańǵyrý» ortalyǵynyń basshysy Tynyshtyq Ermekova bilimdi hám zııatker ult qana tabysqa jetetindigin, bul jastarǵa memleket tarapynan kórsetilip otyrǵan súbeli qoldaý ekendigine toqtaldy.
Búginde alǵashqy 18 kitap men oqý quraly jaryqqa shyǵyp otyr. Oqýlyqtar fılosofııa, áleýmettaný, psıhologııa, til bilimi, ekonomıka, menedjment, dintaný, antropologııa jáne jýrnalıstıka baǵyttary boıynsha aýdarylǵan. Oqýlyqtardyń árqaısysy 10 myń danamen basylyp, joǵary oqý oryndary men kitaphanalarǵa tegin taratyldy.
Jaryq kórgen kitaptardyń qatarynda Djonstonnyń «Fılosofııanyń qysqasha tarıhy: Sokrattan Derrıdaǵa deıin», Entonı Kennıdiń «Batys fılosofııasynyń jańa tarıhy, Antıka fılosofııasy» I-tomy jáne «Batys fılosofııasynyń jańa tarıhy, Orta ǵasyr fılosofııasy» II-tomy, Remı Hesstiń «Fılosofııanyń tańdaýly 25 kitaby», Devıd Brınkerhof, Roýz Ýeıts, Sıýzan Orteganyń «Áleýmettaný negizderi», Djordj Rıtser, Djeffrı Stepnıskıdiń «Áleýmettaný teorııasy», Ellıot Aronsonnyń «Kópke umtylǵan jalǵyz. Áleýmettik psıhologııaǵa kirispe», Dýeın Shýls, Sıdneı Ellen Shýlstiń «Qazirgi psıhologııa tarıhy», Devıd G. Maıers, Jan M. Týenjdiń «Áleýmettik psıhologııa», N. Gregorı Menkıý, Mark P. Teılordyń «Ekonomıks», Donald F. Kýratkonyń «Kásipkerlik: teorııa, prosess, praktıka», Rıkkı Ý. Grıffınniń «Menedjment», Karen Armstrongtyń «Iýdaızm, hrıstıandyq pen ıslamdaǵy 4000 jyldyq izdenis: Qudaıtaný baıany», Vıktorııa Fromkın, Robert Rodman, Nına Haıamstyń «Til bilimine kirispe», Svetlana Ter-Mınasovanyń «Til jáne mádenıetaralyq kommýnıkasııa», Alan Barnardtyń «Antropologııa tarıhy men teorııasy» jáne Klaýs Shvabtyń «Tórtinshi ındýstrııalyq revolıýsııa» atty eńbekteri bar.
Shara barysynda fakýltet oqytýshylary men stýdentteri oqýlyqtarǵa toqtalyp, keńinen talqylady.