«Sıfrly Qazaqstan» memlekettik baǵdarlamasynyń tolyqqandy júzege asýy el turǵyndarynyń turmys-tirshiligin jaqsartýǵa keńinen jol ashady. Ásirese, qatardaǵy azamattardyń sıfrlyq saýattylyǵyn arttyrý qoǵamdy qaǵazbastylyqtan qutqaryp, barlyq saladaǵy ilgerleýshilikke ulaspaq. Saıyp kelgende, sıfrlandyrýdyń jemisi adamnyń zamanǵa laıyqty ómir súrýi ǵana emes, qajetti tutyný qyzmetterin sapaly ári jyldam alýdyń alǵyshartyna aınalady.
Elimizde bul baǵyttaǵy jumystar qarqymen júrgizilýde. «Sıfrly Qazaqstan» memlekettik baǵdarlamasynyń satylap júzege asyrylýy az ýaqyt aralyǵynda nátıjesin bere bastady. Dál osy maqsattyń túpkilikti mindetke aınalý joldary Memleket Basshysy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda da naqty kórsetilgen bolatyn. Búginde basty nazarda turǵan memlekettik baǵdarlamanyń júzege asýyna Úkimet qana emes, basqada qoǵamdyq ınstıtýttar da jumyla kirisip jatyr. Mysalǵa, «Nur Otan» partııasy sıfrlandyrý baǵdarlamasyn damytýǵa arnalǵan óz jobasyn bastap, naqty iske kóshti. Qazir partııa bilikti IT-mamandar pýlyn daıarlaýǵa baǵyttalǵan «IT-mamandardy daıarlaý» bastamashyl jobasyn iske asyra bastady.
Osy joba boıynsha «Nur Otan» partııasy elimizdiń barlyq oblystarynda zamanaýı tehnologııa tilin meńgergen mamandar daıarlaıtyn ortalyqtar ashyp jatyr. Kúni keshe partııanyń Almaty oblystyq fılıalynyń bastamasymen Taldyqorǵan qalasyndaǵy Agrotehnıkalyq jáne Polıtehnıkalyq kolledjderdiń bazasynda eki IT-ortalyq ashyldy.
- Elbasynyń tapsyrmasyna sáıkes «Nur Otan» partııasy elimiz boıynsha 1000 tegin IT-synyp ashý jobasyn qolǵa alyp, sol baǵytta jumys isteýde. Oblys boıynsha 21 IT synyp ashylmaq. Eki jyl ishinde 8100 balaǵa zamanaýı bilimniń álipesin úıretip, elýgege jýyq IT-maman daıarlaý josparlanýda. Mundaǵy maqsat balalarǵa baǵdarlamalaý men robototehnıka negizderine úıretý. Sonyń arqasynda olarǵa qazirgi tańda suranysqa ıe mamandyqtar boıynsha bilim berý. Bul ıgi bastama partııanyń «Sıfrly Qazaqstan» baǵdarlamasyna qosqan qomaqty úlesi, - deıdi partııa fılıaly tóraǵasynyń birinshi orynbasary Ǵalıasqar Sarybaev.
Al arnaıy oqytatyn ortalyqtardyń kásiptik bilim beretin kolledjderdiń negizinde ashylýynda ózindik mán bar. Taldyqorǵandaǵy Agrotehnıkalyq kolledj ben Polıtehnıkalyq kolledj qabyrǵasynda tehnıkalyq mamandyqqa baýlıtyn pánder oqytylady. Buǵan deıin de kolledjderden bilim alyp shyǵatyn baǵdarlamashy, arnaıy tehnıka sheberi sııaqty mamandyqtarǵa suranys joǵary bolyp kelgen. Mamandyq alǵan jastardyń deni jumyspen qamtylýda. Taǵy bir ereksheligi, eki oqý orynynda da aýyldan kelgen jasóspirimder kóptep oqıdy eken. Demek, qazaq balasynyń jańa zamanǵy mamandyqtardy ıgerýge degen yntasy joǵary degen sóz.
- Jańadan ashylǵan ortalyqta IT salasyna qatysty mamandar oqytylyp, jańa tehnologııalarmen qamtamasyz etiletin bolady. Bolashaqta osy IT-ortalyqtar negizinde jastardan jańa ıdeıalar, jobalardjy jınaqtap, jańa býyn jas ǵalymdar qalyptastyrýymyzǵa da múmkindik mol,- dedi bizge Taldyqorǵan Polıtehnıkalyq kolledjiniń dırektory Erqanat Muqajanov.
Qalmahanbet MUQAMETQALI,
«Egemen Qazaqstan»
Almaty oblysy