Astanada sheteldik stýdentter forýmy ótti

Forým «Rýhanı jańǵyrý» baǵdar­lamasyn iske asyrýǵa sheteldik stýdent­terdiń qatysý jobalaryn talqylaýǵa arnaldy. Qatysýshylar «Rýhanı jańǵyrý» baǵdarlamasynyń halyqaralyq deń­geıdegi aqparattyq jáne mádenı keńis­tigin keńeıtý baǵyttary bo­ıynsha óz usynystarymen bólisti.

«Búgin L.N.Gýmılev atyndaǵy Eýrazııa ulttyq ýnıversıtetinde jastar­dyń bas­tamasymen úlken forým ótýde. Ony uıymdastyryp, maqsatyn aıqyn­daýshy osy jerde bilim alyp jat­qan sheteldik stýdentter. Búgingi tańda bul ýnıversıtettiń qabyrǵasynda 500-ge jýyq sheteldik stýdent jáne 30 shaq­ty ártúrli elden kelgen professor­lar qyzmet atqarady.

Mine, aldymyzda demalys aılary bastalady. Osy ýaqytta sheteldik stýdentter óz elderi­ne qaıtady. Sol kezde ózderiniń Qazaq­stan­nan alǵan áserin óz elderine baryp nasıhattap, taratatyn nıetteri bar. Jalpy, elimizdiń joǵary oqý oryndaryn­da 13 000-daı sheteldik stýdent bilim alyp jatyr eken. Olardyń barly­ǵy elderine qaıtqanda Qazaqstan týraly tereń bilip, jerlesterine jetkize alsa, onda elimiz­diń ımıdji kóterilip, tany­mal­dylyǵy arta túser edi», dep atap ótti L.N.Gýmılev atyn­­daǵy Eýrazııa ult­tyq ýnıversıtetiniń rektory Erlan Sydyqov.

Fransııa stýdenti Jeremı Konvert aǵym­daǵy jyldyń aıaǵyna deıin «Rýha­nı jańǵyrý» baǵdarlamasy boıynsha bir­ne­she aksııalardy qamtıtyn «1001 qadam» jastar jobasynyń iske qosy­laty­nyn habarlady. Bul jobanyń a­ıasyn­da stýdentter sheteldik ýnıversıtetter men kitaphanalarǵa Qazaqstan týra­ly kitap­tar syılaıdy, dóńgelek ústel­der men kon­fer­esııalarǵa qatysady, gazet-jýrnaldarda maqala jarııalaıdy, elimiz­diń jetistikterin áleýmettik jeli­lerde keńi­nen talqylaıdy. EUÝ stý­dent­teri Qazaq­­stan­daǵy barlyq sheteldik stý­dent­­ter men sheteldegi bilim alyp jat­qan qazaq­­standyq stýdentterdi osy aksııa­ǵa qoldaý bildirýge shaqyrdy.

Sonymen birge forýmda stýdent jas­tar­dyń áleýmettik jelilerdegi «Biz la­tyn­sha jazamyz – latyndy qoldaımyz» joba­synyń iske qosylýyna qoldaý bildirdi.

Forým sońynda stýdentter qaýymdas­tyǵy osyndaı halyqaralyq mazmundaǵy forýmdy jyl saıyn ótkizý týraly sheshim qabyldady.

Raýan QAIDAR,

«Egemen Qazaqstan»