Elbasynyń óńiraralyq kooperasııany damytý týraly tapsyrmasy aıasynda Batys Qazaqstan oblysynyń ákimi Altaı Kólginov bastaǵan delegasııa О́skemenge kelip, birqatar óndiris oryndaryn aralap, sapar sońynda mańyzdy kelisimderge qol qoıyldy.
«О́skemen armatýra zaýytynda» batysqazaqstandyq delegasııaǵa robottandyrylǵan dánekerleýshi keshen tanystyryldy. Atalmysh kásiporynnyń munaı óndirisine arnalǵan jabdyqtary men qubyr júrgizý armatýralary Reseı jáne О́zbekstan elderinde suranysqa ıe. Al «Sılýmın-Shyǵys» seriktestigi «Qarashyǵanaq» konsorsıýmymen 5 jyldan beri jumys istep keledi.
Oblys ortalyǵyna batysqazaqstandyq delegasııa quramynda kelgen «Qarashyǵanaq Petrolıým Opereıtıng» kompanııasynyń bas dırektory Edvın Blom konsorsıým óndiris aıasyn keńeıtýdiń ekinshi kezeńin bastaıtynyn, osy keshendi jumysqa qazaqstandyq óndirýshilerdi kóptep tartýǵa múddeli ekendikterin jetkizdi. «Joǵary tehnologııamen óndiriletin sapaly jabdyqtardy syrttan almaı, el ishinde tutyný bizge de tıimdi. Shyǵys Qazaqstan oblysynyń kompanııalarymen joǵary deńgeıde jumys isteý tájirıbemiz bar. Bul óńirdiń kásiporyndary ár tarapty qamtıtyndyǵymen tartymdy. Búgin bastaý alǵan dıalog jalǵasyn tabatynyna senimdimin», deıdi E.Blom.
«Qarashyǵanaq» jobasyndaǵy jergilikti mazmunnyń úlesi 54,7 paıyzdy quraıdy. Bul kórsetkishti tórtinshi ónerkásiptik revolıýsııa aıasynda arttyrý kózdelip otyr. Oblys ákimi Danıal Ahmetov delegasııa aralap kórgen kásiporyndardyń barlyǵy da atalmysh talapqa saı jumys istep jatqanyn, О́skemen armatýra zaýyty sońǵy jyldary 100 mıllıon AQSh dollaryna qaıta jańartý jumystaryn júrgizgenin, «Sılýmın-Shyǵys» JShS barlyq óndiris jelisin avtomattandyrýǵa 60 mıllıon AQSh dollarynan astam qarjy jumsaǵanyn aıtty. Batys Qazaqstan oblysynyń ákimi A.Kólginov óz kezeginde Shyǵys Qazaqstanǵa Prezıdenttiń óńiraralyq kooperasııa týraly tapsyrmasyn júzege asyrý maqsatynda kelgenin atap ótti.
Qarashyǵanaq» konsorsıýmynyń otandyq óndirýshilermen seriktestik kókjıegin keńeıtsek pe degen oıymyz bar. Buǵan deıin elimizdiń 8 oblysynda boldyq. Shyǵys Qazaqstan – elimizdegi eń úlken ındýstrııalyq aımaq. Osyndaı saparlardyń arqasynda bizdiń ınvestor buryn shetelden satyp alyp kelgen joǵary tehnologııalyq jabdyqtardyń Qazaqstanda da baryna kóz jetkizýde», dedi ol.
Azamat QASYM, «Egemen Qazaqstan»
О́SKEMEN