«Rýhanı jańǵyrý» baǵdarlamasy aıasynda dúnıejúzindegi úzdik ýnıversıtetter oqýlyqtarynyń qazaqshaǵa aýdarylǵan nusqalarynyń tusaýkeseri ótti. Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda aıtylǵan 100 oqýlyqtyń búginge deıin 18-i aǵylshyn tiilnen tikelaı azaq tiline aýdarylyp, joǵary oqý oryndaryna taratyldy. Qostanaı memlekettik pedagogıkalyq ýnıversıtetiniń ustazdary men ǵalymdary osy 18 oqýlyqtyń tusaýkeserinde olardy tanystyrdy, pikirlerin aıtty.
« Álemdegi moıyndalǵan úzdik oqýlyqtardy aǵylshyn tilinen tikeleı qazaq tiline aýdarý isi, memlekettik tilde bilim alatyn jastarǵa Elbasy tarapynan jasalǵan óte zor qamqorlyq boldy. Mysaly, biz pıshologııa páni boıynsha úsh birdeı oqýlyqqa qol jetkizip otyrmyz. Bul birinshiden, «Jalpy psıhologııa tarıhy», «Áleýmettik psıhologııa» jáne «Kirispe jáne áleýmettik psıhologııa» dep atalady. Jalpy psıhologııa HIH ǵasyrdyń aıaǵynan bastalǵan, jańa damyp kele jatqan ǵylym bolǵandyqtan, álemge aty máshhúr ǵalymdar jazǵan mundaı oqýlyqtarǵa qol jetpegen edi. Bul úlken qol jetken jetistik dep bilemiz» dedi ýnıversıtettiń Psıhologııa jáne defektologııa kafedrasynyń aǵa oqytýshysy, Phd doktory Amanjol Táshetov.
Amanjoldyń fılolog, tarıhshy, matematık, fılosof, taǵy basqa áriptesteri de óz pánderi oıynsha qolǵa tıgen oqýlyqtary boıynsha pikirlerin ortaǵa saldy.
«Úzdik oqýlyqtardyń tili de jatyq, uǵymǵa túsinikti. Alaıda oqýlyqtardyń salmaǵy aýyr, tym qalyń etip túptelgen eken. Bul stýdentterdiń bolashaqta ózimen birge alyp júrýine, tutynýyna qolaısyzdaý bola ma degen de oı keledi. Degenmen, aldaǵy ýaqytta baspagerler men aýdarmashylar tarapynan bul da eskeriler dep oılaımyz» deıdi Áleýmettik-gýmanıtarlyq fakýltet dekanynyń orynbasary Raýan Baıdaly. Oqýlyqtar pedagogıka ýnıversıtetiniń kitaphanasyna, kafedralarǵa tabystaldy. Stýdentter olardy keler oqý jylynan paıdalana bastaıtyn bolady.
Názıra Járimbet,
«Egemen Qazaqstan»
Qostanaı