Aqtóbe oblysynda Halyqaralyq balalardy qorǵaý kúnine arnalǵan aýqymdy is-sharalar ótkizildi.
Mamyr aıynda aımaqta jalpy qazaqstandyq «Nurly bolashaq» balalarǵa arnalǵan memlekettik saıasatty júzege asyrý boıynsha memlekettik organdar, qoǵamdyq jáne úkimettik emes uıymdardyń, bıznes-qoǵamdastyqtyń kúsh-jigerin biriktirýge úndeıtin sonymen qatar, balalardyń quqyqtaryn qorǵaýǵa qoǵamnyń nazaryn aýdarýǵa baǵyttalǵan aksııasy bastaldy. Aqtóbe oblysynda «Máńgilik el» jalpyulttyq ıdeıasyn júzege asyrý aıasynda Halyqaralyq balalardy qorǵaý kúnine arnalǵan balalar men jasóspirimderdiń oryndaý shyǵarmashylyǵyn qoldaý jáne damytý maqsatynda rýhanı, adamgershilik, estetıkalyq tárbıe faktory retinde balalar men jastardyń mýzykalyq orkestri jáne ansambliniń sherýi ótti.
Sherýge qatysýshylardy oblys ákimi Berdibek Saparbaev merekemen quttyqtady.
- Táýelsizdik alǵannan beri Memleket basshysy Nursultan Nazarbaev jas urpaqtyń tárbıesine jáne bilimine erekshe nazar aýdarady. 27 jyl boıy Qazaqstan sizderge barlyq jaǵdaıdy jasaý úshin berik negiz qalady. 2018 jyl Aqtóbe oblysynda Baqytty bala jyly dep jarııalandy. Aımaqta bastaýyn alǵan «Baqytty bala» aksııasy balalardyń barlyq máselelerin sheshýge jáne olardyń jan-jaqty damýyna úles qosýǵa baǵyttalǵan. Jyl basynan beri 600-ge jýyq is-shara ótkizildi, áleýmettik, sporttyq jáne mádenı nysandar salyndy. Aksııa jalǵasady jáne balalardyń ózekti máselelerin sheshýge múmkindik beredi. Eń bastysy, birlik pen turaqtylyq bolýy tıis, biz, eldiń damýyna eleýli úles qosatyn laıyqty jas urpaqty tárbıeleýimiz qajet, - dedi Berdibek Saparbaev paradqa qatysýshylarǵa arnaǵan sózinde.
Oblys ákimi aımaqta jazǵy demalys kezinde demalýǵa arnalǵan tıimdi sharalar qabyldanǵanyn atap ótti. Sonymen qatar, múgedek balalarǵa erekshe nazar aýdarylatyn bolady.
Osynyń dáleli retinde óńir basshysy az qamtylǵan otbasylardan shyqqan, múmkindigi shekteýli balalarǵa, respýblıkalyq jáne halyqaralyq olımpıadalardyń, jarystar men baıqaýlardyń jeńimpazdary men júldegerlerine bilim berý-saýyqtyrý lagerlerine jáne ekskýrsııa jasaýǵa joldamalar berdi.
Bes bala Tatarstannyń kórikti jerlerimen, 100 aqtóbelik bala О́zbekstannyń kıeli jerlerimen tanysyp, 120 bala dástúr boıynsha Orynbor oblysynyń jyl boıǵy lagerinde, taǵy 400 bala Shyǵys Qazaqstan oblysynyń lagerlerinde bola alady.
Osymen tosyn syı bitpeıdi. Oıyl orta mektebiniń túlegi, Burabai Summer Fest halyqaralyq balalar televızııalyq festıvaliniń jeńimpazy Aqnıet Boranbaı uly Ahmet Jubanov atyndaǵy mýzykalyq kolledjiniń grantyn aldy. «Baqytty bala» aksııasy aıasynda ekinshi toptaǵy múgedek Injıfııa Kalıkovanyń kópten bergi armanyn oryndaýǵa múmkindik týdy. Mektep túlegi Q.Jubanov atyndaǵy AО́MÝ-ne túsip «Shet tilderi» mamandyǵy boıynsha bilim alýdy armandaǵan.
Sherý saltanatty sharadan soń oblys ortalyǵynyń basty alańynan júrip ketti.
Aıta keteıik, Aqtóbede sherýge 7 myń adam qosyldy. Olardyń qatarynda múgedek balalar, az qamtylǵan otbasylardan shyqqan balalar, oqý úzdikteri, stýdentter, ustazdar bar. Oblys ortalyǵynyń bas kóshesimen barabanshylar, úrmeli orkestrler men ansamblder, majoretkalar, cherlıderler, hor jáne mýzykalyq aspaptardyń ujymdary júrip ótti. Jalpy alǵanda, aýdandarda da uıymdastyrylǵan sherýge 43 myń adam qatysty.
Temir Qusaıyn,
"Egemen Qazaqstan"
Aqtóbe