Aımaq basshysy Qumar Aqsaqalov óńirge jumys saparmen kelgen “Transneft-Ýral” aksıonerlik qoǵamynyń bas dırektory Tımýr Bezymıannıkovty qabyldady.
Kezdesý barysynda Soltústik Qazaqstan oblysy men atalmysh kásiporyn arasyndaǵy ózara baılanys máseleleri talqylandy.
Taraptar 2018-2022 jyldarǵa arnalǵan “Petropavl” jelilik óndiristik-dıspetcherlik stansııasynyń óndiristik qýatyn qaıta qurý baǵdarlamasy sheńberinde atqarylýy tıis jumystardyń oryndalýyna nazar aýdardy. “Transneft-Ýral” aksıonerlik qoǵamynyń Qazaqstan Respýblıkasynyń aýmaǵynda júrgiziletin qaıyrymdylyq sharalaryna qatysý máselesi de sóz boldy.
Mundaı joǵary deńgeıdegi kezdesý 2014 jyly “Ýraltransnefteprodýkt” pen “Transneft-Ýral” aksıonerlik qoǵamdarynyń birigýinen keıin birinshi ret ótip otyr. Qorǵan munaı basqarmasynyń “Petropavl” jelilik óndiristik-dıspetcherlik stansııasy Ýfa-Omby jáne Ýfa-Petropavl magıstraldy munaı ónimderi qubyry arqyly munaı ónimderin tasymaldaýdy, “Petropavl munaı bazasy» ShS-ne otyn jetkizýdi, Tájikstan men Qyrǵyzstandaǵy tutynýshylarǵa jóneltiletin temir jol vagondaryna munaı quıýdy qamtamasyz etedi. Búginderi “Petropavl” jelilik óndiristik-dıspetcherlik stansııasynda eki júzden astam adam eńbek etip, Ýfa-Omby jáne Ýfa-Petropavl magıstraldy munaı ónimderi qubyrynyń 257 shaqyrymyna qyzmet kórsetedi. Kásiporyn jyl saıyn eki mıllıon tonnaǵa jýyq munaı ónimderin tasymaldaıdy.
“Petropavl” jelilik óndiristik-dıspetcherlik stansııasynda sońǵy jyldary on bir óndiristik nysan, onyń ishinde Esil ózeni arqyly ótetin sý asty magıstraldy munaı ónimderi qubyry tehnıkalyq qaıta quryldy. Toǵyz ǵımaratqa kúrdeli jóndeý júrgizildi. Bul baǵyttaǵy jumystar alda óz jalǵasyn tabatyn bolady.
О́mir ESQALI,
«Egemen Qazaqstan».
Soltústik Qazaqstan oblysy.