Balalardy qorǵaý kúni qarsańynda elordada tanymal otandyq jáne reseılik estrada ókilderiniń qatysýymen Open-Air shoý-konserti ótti. Osylaısha dástúrli shoý Astananyń 20 jyldyǵyna arnalǵan merekelik sharalardyń shymyldyǵyn ashty.
«Qazaq eli» monýmenti ornalasqan alańda ótken konsertke deıin sahna juldyzdary qalanyń áleýmettik mekemelerindegi jáne aýyr syrqattarmen aýyratyn balalarǵa bardy. Atalǵan qaıyrymdylyq aksııany Astana qalasynyń mádenıet jáne sport basqarmasy uıymdastyrdy. Atap aıtqanda, ánshiler Ana men bala ulttyq ǵylymı ortalyǵynyń onkologııa bóliminiń pasıentterimen kezdesip, búldirshinderge myqty densaýlyq tiledi.
– Qandaı keremet balalar! Bárińizge jaqsy kóńil kúı tileımin. Árdaıym qýanyp, shattanyp júrińizder. Barlyq aýrýdan saýyǵyp ketińizder, ata-analarǵa shydamdylyq tileımin, – dedi reseılik ánshi Anna Semenovıch.
Shoý-bıznes ókilderine Ana men bala ulttyq ǵylymı ortalyǵynyń dırektory Rasýlbek Aıpov búldirshinderdiń atynan alǵys aıtty.
– Balama bir jas úsh aı boldy. Osynda tórt aıdan beri jatyrmyz. Biz teledıdardan ǵana kóretin juldyzdardyń qatysýymen ótetin osyndaı aýqymdy sharany alǵash ret kórip otyrmyz. Uıymdastyrýshylarǵa rızashylyq bildiremiz. Balalardy qorǵaý kúni qarsańynda balalarymyz aýyrmasyn, tezirek saýyǵyp ketsin deımin, al ata-analarǵa sheksiz shydamdylyq pen kúsh-qýat tileımin, – dedi kishkentaı Vıtalııdiń anasy Vera.
Dál osy ispetti kezdesý SOS Astana balalar aýylynda, Balalar psıhonevrologııalyq medısınalyq-áleýmettik mekemesinde de ótip, Qazaqstan men Reseı estradasynyń juldyzdary án aıtyp, bı bılep, balalardyń kóńilin kóterdi jáne túrli oıynshyqtar syılady.
«Egemen-aqparat»