Premer-mınıstr Baqytjan Saǵyntaev Qazaqstandaǵy menıngokokk ınfeksııasyna qatysty málimetter jaıly esep berýdi talap etti.
"Juqtyrǵandar kóbeıip jatyr. О́kinishke qaraı, qaıtys bolyp jatqandar bar. Osynyń barlyǵyna túsinik berip otyrýdy suraımyn. Qazir qoǵamda da osy másele talqylanyp jatyr. Qoldanylyp jatqan sharalar jaıly aıtyp berýlerińizdi suraımyn", dedi Premer-mınıstr Densaýlyq mınıstri Eljan Birtanovqa.
Mınıstrdiń baıandamasynan keıin Saǵyntaev halyqpen túsindirme jumystaryn júrgizý qajettigin málimdedi.
"Bul másele bárimizdi alańdatyp otyr. Áleýmettik jelilerde de qyzý talqylanyp jatyr. Shtab jumysy kópshilik aldynda kórsetilýi kerek. Árbir bolyp jatqan jaǵdaı halyqqa túsindirilýi qajet. Túsindirme jumystaryn belsendirek júrgizý kerek. Vaksınasııalaý máselesine de jetkilikti nazar aýdarylyp jatyr. Maǵan kásiporyn dırektorlary, olardyń qyzmetkerleri vaksınasııalaýdyń qajettiligi jaıly aıtyp jatyr. Munyń barlyǵy jetkilikti túsindirilip jatqan joq", dedi B.Saǵyntaev.
Sondaı-aq, premer-mınıstr ákimderden óz óńirlerindegi jaǵdaıdy baqylaýǵa alýdy surady.
Aıta keteıik, osyǵan deıin Parlament Senatynyń tóraǵasy Qasym-Jomart Toqaev ta eldegi menıgıtke qatysty jaǵdaıǵa pikir bildirgen bolatyn.
"Menıngıt ınfeksııasynyń taralýy kónýge bolmaıtyn jaǵdaı. Osy profıldegi mınıstrlik keshirilmeıtin jaıbasarlyq pen batylsyzdyq tanytyp otyr", - dep jazǵan edi Toqaev Twitter jelisindegi paraqshasynda.
Al munyń aldynda densaýlyq saqtaý mınıstri menıngokokk ınfeksııasyna baılanysty karantın jarııalanbaıtynyn aıtqan edi. "Menıngokokk ınfeksııasyn juqtyrǵandar men qaıtys bolǵandardyń sanyn jasyrmaımyz. Qazir karantın jarııalaýdyń qajeti joq. (...) Qazaqstandyqtardan dárigerler aıtqan keńesterdi tyńdaýlaryn suraımyz", - degen edi Birtanov.
Sondaı-aq, osyǵan deıin mınıstr Qazaqstanda 2018 jyldyń basynan beri menıngokokk ınfeksııasynan 12 adamnyń qaıtys bolǵanyn málimdegen edi.