Menıngıt juqpasynyń elimizdiń aýmaǵynda taralýy sebebin anyqtaýǵa úsh apta ýaqyt kerek. Bul týraly búgin Ortalyq kommýnıkasııalar qyzmetindegi brıfıngte Bas memlekettik sanıtarııalyq dárigeri Jandarbek Bekshın málimdedi.
«Materıaldar jınadyq, genomdyq saraptama júrgiziletin bolady. Sodan keıin sıpattamasyna salystyrmaly saraptama jasap, qorytyndy shyǵaramyz. Menińshe, bul jumystarǵa shamamen úsh apta ýaqyt ketedi», - dedi Bekshın.
Onyń aıtýynsha, osy jumystar aıaqtalǵannan keıin menıngıt juqpasynyń elimizde burynnan bar dert ekendigi, týrıster ne sheteldik qonaqtardan taralǵany naqty anyqtalatyn bolady.
«Bizdiń halqymyz da bıznes máselelerimen týrıstik saparlarmen únemi qozǵalysta bolady. Qazaqstannyń ishinde de kóshi-qon prosesi óte joǵary», - deıdi Bas sanıtarlyq dáriger.
Budan bólek Qazaqstannyń bas memlekettik sanıtarlyq dárigeri qazaqstandyqtarǵa betperde taǵyp júrýge keńes berdi.
«Ásirese adam kóp jerde, qoǵamdyq kólikterde jaqyn turamyz. Sondyqtan birrettik betperde taǵyp júrýge keńes beremiz. Kóp márte qoldanýǵa bolatyn betperdeńiz bolsa, ony útiktep, jýyp, qaıta kıińiz. Birretik betperdeni ary ketse eki saǵat qoldanýǵa bolady, ary qaraı ol jaramsyz», dedi Densaýlyq saqtaý mınıstrliginiń Qoǵamdyq densaýlyq saqtaý Komıtetiniń tóraǵasy Bekshın Astanadaǵy brıfıngte.
«Birrettik betperdeni qoldanǵannan keıin tastaý kerek. Eki-úsh saǵattan artyq taǵyp júrý keńes etilmeıdi, sebebi tynys alý kezinde dymqyl aýa taraıdy, onda bakterııa men vırýs kóbeıýi yqtımal. Sondyqtan árbir eki-úsh saǵat saıyn betperde aýystyrý kerek. Betperdeni naýqastar taǵý kerek deıtinder de bar. Aýyratyn adamdar qoǵamdyq kólikte júrmeýi kerek. Olar túrli sharalarǵa qatyspaýy kerek. Betperdeni negizinde aýyrmaý úshin taǵady», - dedi Bekshın.
Munyń aldynda Qazaqstannyń densaýlyq saqtaý mınıstri Eljan Birtanov 2018 jyly menıngıt juqtyrýdyń 58 jaǵdaıy tirkelgenin málimdegen edi. 12 adam qaıtys bolǵan, onyń beseýi balalar. Dert juqtyrǵandardyń tiziminde 14 jasqa tolmaǵan 18 bala bar.