Qazaqstannyń eńbek sińirgen qaıratkeri, «Qurmet» ordeniniń ıegeri, Jambyl atyndaǵy halyqaralyq syılyqtyń laýreaty Jolaman Tursynbaev elimizdiń betke ustar kompozıtorlarynyń biri ekeni daýsyz.
Onyń júrek tolǵanysynan, kóńil tolqynysynan, sezim pernesinen, shyǵarmashylyq shabytynan týǵan ánnen operaǵa, shaǵyn dıvertısmentten sımfonııaǵa deıin túrli janrdy qamtıtyn týyndylary jıi oryndalatyny sondyqtan. Qazaqtyń uly tulǵalaryna arnalǵan «Er Jánibek», «Beket ata», «Tóle bı», «Ulbıke» sekildi birtýar dúnıeleri avtordyń ózindik qoltańbasymen, áýezdi únimen erekshelenedi. Al «Aýylynda bar aǵanyń qyzqaraǵaı» ánin «teriskeıdiń brendi» dese de bolady.
Soltústikqazaqstandyq ónersúıer qaýymnyń jerlesin qurmet tutatyny sonshalyq, jastar saraıynda ıne shanshar oryn bolmady. «Aınalaıyn, Qyzyljar!» shyǵarmashylyq keshinde sóılegen sózinde óńir basshysynyń orynbasary Madııar Qojahmet oblys ákimi Qumar Aqsaqalovtyń jyly sezimge toly quttyqtaý lebizin jetkizip, ıyǵyna shapan japty. Mádenıet jáne sport mınıstri Arystanbek Muhamedıulynyń Alǵys haty tabys etildi. Qazaqstan Kompozıtorlar odaǵynyń tóraıymy Balnur Qydyrbektiń sózi óte áserli shyqty.
«Sońynan erip kele jatqan biz úshin – asyl aǵa, zamandastary úshin – kemeńger, al qazaq óneri úshin qatardaǵy jaýynger. Kez kelgen maıdan jeńiske qatardaǵy ár jaýyngerdiń arqasynda jetedi. Qazaq óneri de solaı. Sońǵy jyldary eki notanyń basyn qosqanyna máz bolyp, ózin keremet sanap, keýdesin soqqandar kóbeıip ketti. Biraq olar emes, búginde qazaq ónerin damytyp, bıik shoqtyqqa shyǵaratyn – kúndelikti isin sapaly, kórkem túrde atqaratyn kásibı maman ǵana. Sol kásibı sheberligimen óz úlesin qosyp júrgen talant ıeleriniń biri–bizdiń Jókeń», deı kelip, patrıottyq taqyrypqa jáne lırıkaǵa toly eki qyryn aıryqsha atap ótti.
Sahna shymyldyǵy Segiz seri atyndaǵy qazaq halyq aspaptar orkestri men «Ádemi-aý» halyq bı ansambliniń súıemeldeýinde «Eligaı» ániniń oryndalýymen ashyldy. Respýblıkalyq baıqaýlardyń laýreattary Dınara Taýysheva, Baqyt Ilııasov, Dámesh Qurmankına, Ashat Taýyshev kompozıtordyń «Esilim», «Týǵan jer», «Ulbıkeniń sońǵy áni», «Beket ata – pir ata» ánderin naqyshyna keltire oryndap berdi. Qazaqstannyń eńbek sińirgen qaıratkeri, Tuńǵysh Prezıdent qorynyń laýreaty, Qazaq ulttyq óner ýnıversıtetiniń professory Azamat Jyltyrkózov «Meńgeser», «Atyraýym – atajurtym», «Aıgúlim» ánderin syılap, jurtshylyqtyń qulaq quryshyn qandyrdy.
Osy keshte birqatar jańa ánderdiń tusaýy kesildi. Solardyń biri bıyl 125 jyldyq mereıtoıy atap ótiletin Maǵjan Jumabaevtyń «Aıdyn shalqar kólim-aı», «Qazaq tili» óleńderine jazylǵan ánder jınalǵandardy erekshe tebirentip, nur shýaǵyn tógildirgendeı sezimge bóledi.
Kesh sońynda kompozıtordyń týǵan jeri – Esil aýdany ákiminiń orynbasary Edil Tutqyshev, aýdandyq ardagerler keńesiniń tóraǵasy Tólegen Muqashev, belgili jazýshy-jýrnalıst Jaqsybaı Samrat júrekjardy tilekterin arnap, syı-sııapattar jasady. Ult janashyrlarynyń biri Jomart Omarov óńir kásipkerleri atynan «temir tulpardyń» kiltin tartý etti.
– Aınalaıyn, Qyzyljarym! Saǵan basymdy ıemin! Alaqanǵa salyp ósirdińder, erkelettińder! Men úshin budan asqan baqyt joq! – dep tebirene, tolǵana sóılegen óner ıesi shyǵarmashylyq keshin ótkizýge bir kisideı atsalysqan kópshilikke aq alǵysyn bildirdi.
О́mir ESQALI,
«Egemen Qazaqstan»
Soltústik Qazaqstan oblysy