Astanadaǵy «Dáýlet» tennıs ortalyǵynda bokstan halyqaralyq VI Qazaqstan Prezıdenti kýbogy týrnıri bastaldy. Osy jarysqa oraı arnaıy baspasóz máslıhaty ótip, oǵan Qazaqstan boks federasııasynyń úılestirýshisi Bolat Ábdirahmanov, erler ulttyq quramasynyń bas jattyqtyrýshysy Myrzaǵalı Aıtjanov, qyzdar quramasynyń bas jattyqtyrýshysy Vadım Prısıajnıýk, Rıo Olımpıadasynyń kúmis júldegeri Vasılıı Levıt jáne qyzdar arasynda álemniń eki dúrkin chempıony Nazym Qyzaıbaı qatysty.
Bıylǵy dodaǵa Belarýs, Úndistan, Japonııa, Qyrǵyzstan, Mońǵolııa, Qytaı, Fılıppın, Reseı, Shvesııa, Tájikstan, Taıland, Túrikmenstan, AQSh, О́zbekstan jáne elimizdiń eń úzdik degen 180-ge jýyq bylǵary qolǵap sheberi qatysýǵa nıet bildirgen. Sonymen qatar atalǵan elderdiń qyzdar quramasy da Astanada óz baqtaryn synamaq. Qazaqstan kýbogynda erler tolyq 10 salmaq boıynsha, qyzdar tórt salmaq, ıaǵnı 51, 57, 60 jáne 75 kılo salmaqta judyryqtasady.
Bolat Ábdirahmanovtyń aıtýynsha, bokstan VI Qazaqstan Prezıdenti kýbogyna eń kóp boksshy Taıland elinen kelgen. «Jarysqa qatysýshy 15 eldiń ishinen eń kóp bylǵary qolǵap sheberi Taıland quramasyna tıesili. 17 boksshy. Ekinshi orynda 16 boksshy ákelgen О́zbekstan quramasy bolsa, Úndistannan 14 bylǵary qolǵap sheberi keldi. Sonymen qatar jarysqa qatysýshylardyń basym bóligi óz eliniń nómiri birinshi boksshylary. Mysaly, О́zbekstan quramasynan Olımpıada chempıondary – Hasanboı Dýsmatov (49 kg) pen Shahobıddın Zoırov (56 kg), Taıland quramasy sapyndaǵy eki dúrkin Azııa chempıony Výttıchaı Masýk (64 kg) jáne 2015 jylǵy qurlyq chempıony Chatchaı Býtdı (52 kg). Sondaı-aq 2015 jylǵy álem chempıonatynda Danııar Eleýsinovpen kezdesken fılıppındik Eýmır Marsıal (69 kg) men Charlı Sýares (60 kg) de keldi», deıdi ol.
Al qurama bas jattyqtyrýshysy Myrzaǵalı Aıtjanov bokstan Prezıdent kýbogy Azııa oıyndaryna baratyn quramdy anyqtap beredi deıdi. Sondaı-aq ol atalǵan týrnır Azııa elderiniń quramalary úshin Azııa oıyndary aldyndaǵy sońǵy daıyndyq ispetti ekenin aıtty. «Birinshi kezekte bokstan Prezıdent kýbogy Azııa oıyndary aldynda ótkizilip jatqany zor mańyzǵa ıe. Týrnırge bizdiń Azııadaǵy bas- ty qarsylastarymyz О́zbekstan, Qytaı, Mońǵolııa sııaqty quramalar óz eliniń úzdikterin alyp keldi. Bul biz úshin de jaqsy tájirıbe almasý jáne Azııa oıyndary aldynda kúshimizdi bir baıqap alýǵa jaqsy múmkindik. Osy jarystan soń Azııa oıyndaryna baratyn qurama birshama anyqtalyp qalady. Degenmen bir-eki salmaqta áli de irikteý bolady», deıdi bas jattyqtyrýshy.
Bokstan VI Qazaqstan Prezıdenti kýbogy 10 maýsymǵa deıin jalǵasady. Boks jankúıerleri jekpe-jekterdi «Qazsport» telearnasynan tamashalaı alady.
Álı BITО́RE,
«Egemen Qazaqstan»