Qazaqstan Respýblıkasynyń Memlekettik hatshysy Gúlshara Ábdiqalyqova «Serpindi tehnologııalar dáýirindegi joǵary bilim ınnovasııasy» atty Joǵary bilim berý kóshbasshylarynyń VII Eýrazııalyq forýmynyń ashylý rásimine qatysty.
Bul forým 2011 jyldan beri ótkizilip keledi. Onyń maqsaty – tehnologııalyq jáne áleýmettik ózgerister turǵysynan bilim berý sektoryn talqylaý.
Forým jumysyna ulttyq jáne álemdik sarapshylar, ǵylymı qyzmetkerler, memlekettik organdardyń, jumys berýshilerdiń, bilim salasyndaǵy qoǵamdyq birlestikterdiń ókilderi, sondaı-aq álemniń 15 elinen (AQSh, Reseı, Qytaı, Ulybrıtanııa, Koreıa Respýblıkasy, Avstralııa jáne t.b.) 150-den astam delegat qatysty.
Gúlshara Ábdiqalyqova quttyqtaý sózinde bıylǵy forýmnyń Qazaqstannyń sımvoly – Astananyń 20 jyldyq mereıtoıy qarsańynda ótkizilip otyrǵanyn aıtty.
Memlekettik hatshy G.Ábdiqalyqova Elbasynyń bilim berý júıesiniń jan-jaqty damýyna aıryqsha kóńil bóletinin atap ótip, Nursultan Nazarbaevtyń: «Men árdaıym sizderdiń bilim alýlaryńyz ben damýlaryńyz úshin qajetti barlyq jaǵdaıdy jasaýǵa tyrysyp kelemin. Álemdik deńgeıdegi ýnıversıtet, zııatkerlik mektepterin ashtym, «Bolashaq» baǵdarlamasyn bekittim» degen sózine toqtaldy.
Nazarbaev Ýnıversıteti – elimizdiń mańyzdy ulttyq jobasy. Osy oqý orny ashylǵannan beri (2010 j.) onyń qabyrǵasynan 2 myńǵa jýyq maman túlep ushty. Ýnıversıtet bıohımııalyq jáne ıadrolyq ınjenerııa, robototehnıka, mehatronıka jáne basqa da sırek baǵyttar boıynsha kadrlar daıarlaıdy. Munda álemniń túpkir-túpkirinen kelgen úzdik oqytýshylar jumys isteıdi jáne eń zamanaýı materıaldyq-tehnıkalyq quraldarmen, zerthanalarmen jabdyqtalǵan.
Búginde Nazarbaev Ýnıversıteti jahandyq deńgeıdegi ǵylymı-bilim berý ortalyǵyna aınalyp, Qytaı, Japonııa, Koreıa Respýblıkasy, Sıngapýr jáne Azııadaǵy basqa da elderdiń 14 jetekshi ýnıversıtetteriniń qataryna qosyldy.
– Joǵary oqý oryndary keleshekte eńbek naryǵyndaǵy básekege tótep berý úshin, bilimniń úzdik baǵdarlamalary boıynsha oqytylǵan jańa formattaǵy mamandardy daıarlaýǵa tıis, – dedi Memlekettik hatshy.
Forým sońynda Gúlshara Ábdiqalyqova jıynǵa qatysýshylardyń syndarly suhbat quryp, tabysty jumys isteýine tilektestigin bildirdi.