Sazgerdiń syrly álemi

Aıgúl Dosmaǵambetova tulymshaǵy jelbiregen kúnnen ónerge qumar bolyp ósti. Mektep qabyr­ǵasynda oqyp júrgende mýzykalyq stýdııada fortepıano klasy boıynsha bilim aldy. Baǵdarlamadan tys mýzykalyq úıir­melerge qatysa júrip, qoly qalt etken sátterde pıanıno kabınetine qaraı tura júgiretin. Ońashada mýzyka áleminiń nebir tuńǵıyq syrlaryna berilip, oı saıahatyn keshkendi unatatyn. Sondaı sátterde boıyn áldebir sezim sharpyp, tynym bermeıtin. Sóıtse, shabyt ushqyn­dary eken ǵoı. Mektep bitirgen soń kóp oılanǵan joq. Birden P.I.Chaıkovskıı atyndaǵy mýzyka­lyq kolledjge tartty. Sosyn Qurman­ǵazy atyndaǵy Almaty memlekettik kon­ser­vatorııasynyń hor dırıjeri klasyn bitirdi. Bazarǵalı Jamanbaev, Anatolıı Molodov, Vıtalıı Orlenın, Tamara Alıbakıeva, Qorlan Mýsına sekildi bilikti professorlar men kásibı mamandardan tálim alyp, dombyranyń qos shegi ispettes teorııalyq bilim men tájirıbege qatar shyńdalyp shyqty. Sodan beri ómiri jas balǵyndardan ajy­raǵan emes. Alǵa qoıǵan arman-maqsat adamǵa birden jetkize qoıý­shy ma edi. Alystan munarlanǵan aldamshy saǵym qusap, onyń buralań joldary kóp bolatynyn Aıgúl alǵash­qyda albyrt­tyqpen baıqamapty. Alma­­tydaǵy jyly turaǵyn otbasymen Kókshe­taý qalasyna aıyrbastap, táýekelge bel býýy sondyqtan edi. Teriskeıdegi jer jannatyna kelip edi, ekinshi tynysy ashy­lyp sala bergendeı boldy. Halqy­myzdyń baǵa jetpes asyl muralaryn nasıhattaý, salt-dástúrle­ri­mizdi jan-jaqty dáripteý sharalaryna belsene kirisip ketti. Jetkinshekterge arnap ánder jazyp, óńdep, birneshe dısk jına­ǵyn shyǵaryp úlgerdi. Qyzyǵy men shyjyǵy qatar júretin tynymsyz eńbektiń qadir-qasıetin uǵyn­ǵanǵa ne jetsin! «Zvonochek» balalar baqshasyndaǵy jas qaıyńdaı jelkildep ósip kele jatqan bir top búldirshinderdiń basyn qosyp, dombyra tobyn uıymdas­tyrǵan bolatyn. Sol kezdegi kóńildegi qobaljýdy aıtyp jetkizý qıyn. Nebir sekemshil oılar kóńil túkpirine qamalyp, janyn jegideı jegen kúnder qursaýlap aldy. Qalalyq baıqaýda onyń jetekshiligindegi dombyrashylar birinshi oryndy jeńip alǵanda sener-senbesin bilmeı qatty tolqyǵany ras. Ile-shala ol bap­taǵan gýmanıtarlyq-tehnıkalyq lıseıdiń ul-qyzdarynan quralǵan dombyrashylar ansambli «Qazaǵymnyń úni sensiń, dom­byra!» atty konkýrsta laýreat atanǵanda boıynda ózine degen úlken senim ornyqty. Mańdaı terdiń óteýi degen osy! Qýanysh qushaǵynan aıyǵa almaı júr­gende Astana qalasyndaǵy №1 mýzykalyq balalar mektebinen alǵys hat aldy. Onda onyń basqarýyndaǵy «О́leń» mýzyka-baspa stýdııasyna jyly lebiz arnalǵan eken. Jetkinshekterdi ónerge baýlyp, avtorlyq ánder jazǵany, óńdep, jınaq shyǵarǵany úshin shyǵarmashylyq sáttilik tilepti. «Jaqsy sóz – jarym yrys», degen. Tanyp-bilmeıtin ujymnyń ózine joldaǵan ystyq yqylasy qanat bitirdi. Aıgúlge jeke stýdııa ashý ońaı bolǵan joq.Talaı qıyndyqtarǵa kezikti. Alǵash­qy kezderi dybysty jazyp, óńdeıtin tehnıkalyq qural-jabdyqtar ońaılyqpen taptyra qoımady. Biraq qaısar minezi, alǵa qoıǵan maqsatkerligi arqasynda kese-kóldeneń turǵan kedergilerdi jeńip shyqty. Búginde stýdııanyń án dıskilerine suranys óte kóp. Balabaqshalardan, mektepterden tapsyrys úzbeı túsip jatady. Ol qazir ánmen qosa dombyra klasyna da sabaq beredi. Osy úshin fılarmonııadan jáne qazaq mýzykalyq komedııa teatrynan jumystan shyǵyp, balabaqsha men mektepke ornalasty. Onyń bala kezgi armany osylaı oryndaldy. Jas búldirshinderdi qazaqtyń qasıetti dombyrasynyń tylsym syryna baýlý úshin ózi de tartýdy bir kisideı meńgerip aldy. Aıgúl Qaıyrjanqyzy óziniń pedago­gıka­lyq qyzmetinde árkez sheteldik ozyq tájirıbelerge de súıenip otyrady. Máse­len, Marııa Montessorıdiń aldymen jazý, sosyn oqý degen úlgisine den qoısa, Valdorftyń shyǵarmashylyq erkindigi qatty qyzyqty­rady. Al, Selestena Fre­neniń balalarǵa úlkendershe qaraý, ózara qarym-qatynastaǵy syılasymdylyq us­ta­nymy tánti etedi. Osyndaı úlgi alar­lyq taǵylymdardy oı ele­ginen ótkize kelip, óziniń jeke tájirı­besinde shyǵarma­shylyq, oılaý daǵdysyn qalyptastyrýǵa kúsh salady. Sazgerlik onyń boıyna baq bolyp qonǵan. Sońǵy kezderi dıskilerdi memlekettik tilde shyǵarýdy úrdiske aınaldyra bastady. Ol qurastyrǵan dıskiler men ánderdiń balabaqsha erteńgilikterinde, túr­li konsertterde shyrqalmaǵan kezi joq. Teatrlandyrylǵan ertegiler jazyl­ǵan dıskilermen tutas dybystyq spektaklder shyǵarý da óz jemisin berip keledi. Máselen, taıaýda «Tyńdaımyz, sýret salamyz, oılaý­dy damytamyz» serııasy aıasynda onyń qazaq ertegisiniń jelisimen jasaǵan «Bota­qan» dıskisi búldirshinder qolyna tıdi. Qazir stýdııa qyzmetkerleri Aıgúldiń jetekshiligimen jańajyldyq dısk ázir­leýge kirisip ketken. Ol ınnovasııalyq tehnologııa negizinde jasalyp, «Álemdik klas­sıkanyń beınekolleksııasy» degen serıalmen tara­latyn bolady. Onda qazaq, orys jáne shetel mýzykalarynyń anto­logııasy toptasty­rylyp, jergilikti kom­pozıtor­lardyń ánderi men oryndaýshy­laryna basymdyq beriledi. Aıgúl Dosmaǵambetova 3D formattaǵy jańa mýltfılmder túsirý qajet dep sanaıdy. Ol óziniń aýdıertegilerge án jazý tá­jirıbesine súıene oty­ryp mýltfılm jasaýshylarmen tyǵyz áriptes­tik baılanys ornatqan. Osylaısha, sazgerdiń syrly álemi ónerdiń nebir túrlerimen toǵysyp, búgingi ýaqyt ty­nysyn beınelep jatqany anyq ańǵarylady. О́mir ESQALI, Kókshetaý.