Birer kúnnen keıin elorda tórinde Mádenıet jáne sport mınıstrliginiń uıytqy bolýymen «Nur kelbetti Astana» atty halyqaralyq kórkemsýret festıvali bastalady. Aıtýly mereke qarsańynda bas qalanyń aıshyqty kelbeti otandyq jáne sheteldik kórkemóner sheberleriniń qylqalamyna arqaý bolmaq.
Kópten kútken óner jármeńkesine otandyq sýretshilermen qosa Brazılııa, AQSh, Eýropa, Reseı, Japonııa, Úndistan syndy álem elderinen dańqty qylqalam sheberleri arnaıy shaqyrylǵan. Olardyń qatarynda Ulybrıtanııanyń Koroldik óner qaýymynyń múshesi Aleksandra Konnor, Japonııanyń akvarelmen beıneleý óneriniń has sheberi Akıra Mýrata, Brazılııadaǵy Panamerıka óner mektebiniń tálimgeri Jızel Ýlıss, Úndistannyń zamanaýı kórkemóner sheberi Ram Vıranıan, AQSh Ulttyq óner grantynyń ıegeri Artem Mırolevıch, Gollandııanyń retrospektıvalyq kórkemóner sheberi Dımıtrıs Voıazogloý, sonymen qatar Gúlmıra Telǵozıeva, Baqtygereı Teleýbaı, Amangeldi Kenenbaev, Nurbazar Qojın, Qaıyr Orazǵalıev, Aınabek Ospanov, Tileýjan Batanov syndy otandyq sýretshiler de bar.
Qylqalam sheberlerin bir óner ordasyna jınaǵan kórkemóner festıvali qarsańynda elordaǵa kelgen alǵashqy meımandar óz oılaryn bildirdi. Máselen, Úndistannan at basyn burǵan akvarelmen beıneleý óneriniń sheberi Ram Vıranıan: «20 jyl kóp ýaqyt emes. Alaıda osy merzim ishinde elordanyń eńsergen jetistikteri tańdaı qaqtyrady. Kórkemsýret festıvalinen tek jarqyn sátter men jaǵymdy áser alatynyma senimdimin» dese, brazılııalyq sýretshi Jızel Ýlıss: «Astanadan alǵan alǵashqy áserim keremet: halqy qonaqjaı, qala taza ári zamanaýı. Astananyń 20 jyldyǵy qarsańynda kúnnen-kúnge órken jaıyp kele jatqan shahardy óz kózimmen kórgenime óte qýanyshtymyn», dep lebizin jetkizdi.
Elordanyń 20 jyldyq tarıxyn, mádenı jetistikteri men qonaqjaı xalqyn tanystyrýǵa baǵyttalǵan kórkemsýret merekesi aıasynda otandyq jáne sheteldik sheberler jazdyń jaımashýaq kúnderinde jeke qalaýlary boıynsha Astananyń kórikti jerlerin kenep betinde kómkermek. Atalǵan kórkemsýret festıvali Ulttyq mýzeıde uıymdastyrylady. Sondaı-aq qylqalam sheberleri Oqýshylar saraıynda jáne Qazaq ulttyq óner ýnıversıtetiniń qabyrǵasynda degdar ónerge qyzyǵatyn daryndy tálimgerler úshin sheberlik sabaqtaryn ótkizbek. Festıval 12 maýsymda bas-
talyp, aı sońyna deıin jalǵasyn tabady. Tanymy tereń, talǵamy bıik kórermen úshin sheteldik sheberlerdi shabyttandyrǵan ásem shahardy ózge qyrynan tamashalaýdyń taptyrmas múmkindigi týyp otyr.
Arman OKTIаBR,
«Egemen Qazaqstan»