Ál-Farabı atyndaǵy QazUÝ álemdegi 800 eń úzdik ýnıversıtet arasynda 220 orynǵa taban tirep, QS «World University Rankings» halyqaralyq reıtınginde taǵy da 16 satyǵa joǵarylady. Bul topqa postkeńestik keńistikten tek eki ýnıversıtet kirdi. Olar: QazUÝ jáne Lomonosov atyndaǵy Máskeý memlekettik ýnıversıteti (RF).
Elbasy Qazaqstannyń joǵary oqý oryndary aldyna álemdegi eń úzdik 200 JOO qataryna kirý mindetin qoıǵany málim. QazUÝ álemdik keńistikte moıyndalǵan elimizdiń jetekshi ýnıversıteti retinde osy mańyzdy memlekettik tapsyrmany iske asyrýda maqsatty jumys atqaryp keledi. Sońǵy bes jylda ýnıversıtet «QS WUR» reıtınginde 400-den astam pozısııaǵa kóterilgen. Álemdik tájirıbede birde-bir ýnıversıtet osyndaı ósý dınamıkasyna qol jetkizbegen kórinedi.
QS álemdegi barsha memlekettermen tanylǵan bedeldi jáne kóptegen jyldar boıy álemdegi úzdik joǵary oqý oryndarynyń jahandyq reıtıngin júrgizip kele jatqan yqpaldy halyqaralyq agenttikterdiń biri.
QazUÝ-diń osy reıtıngte tabysty ilgerileýiniń mańyzdy faktory keń aýqymdy qurylymdyq jańǵyrtý, nátıjege baǵyttalǵan basqarýdyń joǵary tıimdiligi, sondaı-aq sońǵy bes jyl ishinde 40 paıyzǵa ósken biregeı ınfraqurylymnyń qarqyndy damýy dep aıtýǵa bolady. Álemdik deńgeıdegi zertteý ýnıversıtetine aınalý baǵytyn saqtaı otyryp, QazUÝ medısına-bıologııalyq jáne ınnovasııalyq IT klasterin qalyptastyrý boıynsha jumys jasaýda. Onyń negizin jańa sýperkompıýter quraıtyn bolady.
Ýnıversıtettiń álemdik deńgeıde tanylýy turaqty damý boıynsha BUU-nyń «Akademııalyq yqpal» baǵdarlamasynyń Ǵalamdyq haby retinde belsendi qyzmetimen jáne onyń halyqaralyq jobalarymen de baılanysty. Olardyń ishinde QazUÝ usynǵan ınnovasııalyq-tehnologııalyq jáne rýhanı-adamgershilik platformalardyń sımbıozyna negizdelgen «Ýnıversıtet 4.0» jańa býyn ýnıversıtetiniń modeli bar.
Búginde atalǵan oqý ornynyń tańǵalarlyq tájirıbesin álemniń jetekshi ýnıversıtetteri zertteý ústinde, bul ýnıversıtettiń joǵary básekege qabilettiliginiń kórsetkishi bolyp tabylady. Jetekshi qazaqstandyq joǵary oqý ornynyń álemdik ǵylymı-bilim berý keńistigindegi artyp kele jatqan rólin eskere otyryp, «QS Worldwide» atqarý keńesi 2019 jyldyń qyrkúıeginde ál-Farabı atyndaǵy QazUÝ negizinde búkilálemdik forým jáne joǵary oqý oryndarynyń halyqaralyq kórmesin ótkizý týraly sheshim qabyldady. Osyndaı aýqymdy is-sharany ótkizý Qazaqstannyń ósip kele jatqan bedelin aıǵaqtaıdy jáne eldiń joǵary bilim berý júıesin alǵa jyljytýǵa yqpal etetin bolady.
Arman OKTIаBR, «Egemen Qazaqstan»