Elordadaǵy Ulttyq akademııalyq kitaphanada «Qazaqstannyń azamattyq alıansy» zańdy tulǵalar birlestiginiń konferensııasy ótti. Oǵan jergilikti jáne aımaqtyq azamattyq alıans ókilderi men jetekshileri jáne Astana qalasynda ornalasqan belsendi úkimettik emes uıymdar ókilderi qatysty. Konferensııa barysynda Azamattyq alıanstyń damý keleshegi, VIII Azamattyq forýmǵa daıyndyq máseleleri men aımaqtardaǵy úkimettik emes uıymdardy tolǵandyratyn ózekti máseleler talqyǵa salyndy.
Jıynǵa qatysqan Din isteri jáne azamattyq qoǵam mınıstri Darhan Kaletaev Azamattyq alıans Qazaqstandaǵy azamattyq salany damytýshy kúshterdiń biri bolyp qala beretinine toqtaldy. «Bul qurylym elimizdiń barlyq óńirlerindegi úkimettik emes uıymdardyń belsendi jáne tájirıbeli kóshbasshylaryn biriktire alady, sondaı-aq halyqaralyq uıymdarmen, bıznes jáne memlekettik organdarmen birlesken tıimdi jumysty uıymdastyrýdy qamtamasyz etedi», dedi D. Kaletaev. Sonymen qatar mınıstr úkimettik emes sektordyń turaqtylyq deńgeıin kóterý jáne úkimettik emes uıymdar men memleket arasyndaǵy konstrýktıvti baılanysty ornatý boıynsha atqarylyp jatqan jumystar týraly aıtyp ótip, kommersııalyq emes uıymdardyń qyzmeti týraly zań jobasynyń negizgi jańashyldyqtaryna toqtaldy.
Jıynda Qazaqstannyń Azamattyq alıansymen birlese júzege asyrý úshin birqatar naqty bastamalar usynyldy. Atap aıtqanda, azamattyq qoǵamdy damytý salasyndaǵy zańnamany jetildirý jáne azamattyq sektordy damytý jónindegi Jol kartasyn iske asyrý jumystarynda Azamattyq alıanstyń áleýetin barynsha paıdalaný máselesi kóterildi.
Sonymen qatar konferensııada úkimettik emes uıymdardy qaıta tirkeýden ótkizý týraly usynys talqylandy. Elimizde 20 myńnan astam uıym tirkelgen kórinedi. Qarjy jáne Ádilet mınıstrlikteri júrgizgen tekserýden keıin olardyń 8 myńdaıy múldem jumys istemeıtini anyqtalǵan.
Venera TÚGELBAI, «Egemen Qazaqstan»