Almatyda «Áleýmettaný: jańa urpaqqa jańa oqýlyqtar» atty dóńgelek ústel ótti

Búginde Ulttyq aýdarma bıýrosy daı­yn­­da­ǵan 18 oqýlyq barlyq JOO kitap­­hana­laryna taratyldy. Onyń ekeýi áleýmettaný boıyn­sha ázirlengen oqý­lyqtar, atap aıtqanda, álem­dik áleý­mettaný ǵylymynyń eń bedeldi ókili Djordj Rıserdiń «Áleýmettaný teorııasy» jáne amerıkalyq áleýmettanýshy Devıd Brınkerhoftyń «Áleýmettaný negiz­de­ri» dep atalatyn oqýlyqtaryna bilim shańy­raqtaryndaǵy ustazdar men stýdentter qazirdiń ózinde qyzyǵýshylyq tanytyp, mazmunymen tanysýdy bastap ketti. Bıylǵy jyldyń 1 qyrkúıeginen bastap bilim berý prosesine engizilgeli otyrǵan alǵashqy 18 oqý­lyqtyń sapasy men salmaǵyna baılanysty áleý­mettaný ǵylymy mamandarynyń naqty usy­nystaryn tyńdap, talqylaý úshin arnaıy uıym­dastyrylǵan basqosý birqatar dáıekti paıym-kózqarastardyń alańy bolýymen nazar aýdartty. 

Basqosý maqsaty – áleýmettaný boı­yn­­sha jańa oqýlyqtardy bilim berý pro­­sesine engizý jaıyn talqylaý jáne so­ǵan baılanys­ty oı tujyrý. Jıyndy júr­­­gizgen ál-Farabı atyndaǵy QazUÝ-diń áleýmettik damý jónindegi pro­rek­tory, áleýmettaný ǵylymdarynyń dok­tory Shol­pan Jamanbalaeva, QR Prezı­d­enti janyn­daǵy QSZI áleýmettik-eko­no­mıkalyq zert­­teýler ortalyǵynyń je­tekshisi Lázzat Nurqatova alǵashqy oqý­lyq­tar qatarynda qazaq tiline tuńǵysh ret aýdarylyp, qazaqstandyq áleýmettaný ǵylymynyń kitap qoryn tolyqtyrǵan qos oqýlyqtyń jeke tulǵanyń kásibı da­mýynda alatyn rólin erekshe atap ót­ti. Qoǵamdaǵy ózekti máselelerdi klas­sı­ka­lyq jáne qazirgi kózqarastardy ush­tas­tyra otyryp taldaǵan bul eńbek­ter­diń Qazaqstanda jańadan qanat jaıyp ke­le jatqan jas ǵylym salasy bolyp sana­latyn áleýmettaný áleýetin kóterip, órkendetýdegi mańyzy da óz aldyna bir tóbe jetistik.

Memleket basshysynyń bastamasymen qolǵa alynyp, memlekettik baǵdar­la­maǵa aınal­dyrylyp, qoǵamǵa tartý ja­sap otyrǵan jobaǵa jetekshilik etip, ja­ńa­lyǵy mol ádebıetterdi tárjimalaý isine mamandardy jumyldyryp otyrǵan Ulttyq aýdarma bıýrosynyń atqarýshy dırektory Raýan Ken­jehanuly «100 jańa oqýlyq» jobasy tóńireginde jasa­lyp jatqan jumysqa jan-jaqty toq­tal­dy. «Búgingi áńgime oqýlyqtardyń maz­­­munyna úńilýden týyp otyr. Shyn má­­ninde, Ortalyqtan ázirlengen oqý­lyq­­tar qazirgi qazaqstandyq bilim berý júıesine, ǵylymdaǵy jas býyn mamandardy qalyptastyrýdaǵy onyń erekshe mańyzdylyǵyna, búgingideı óte jyldam júrip jatqan qoǵamdaǵy ózgeristerge tek áleýmettanýshylar ǵana emes, basqa salada bilim alyp jatqan jas mamandar da tereńirek úńilip, olardyń jeke adam retinde, maman retinde qalyptasýyna kómektesetin quraldar bolsa eken dep oıladyq. Sol sebepti oqýlyqtardy irik­tep, tańdaǵan kezde mamandardyń basyn qosyp, keń talqylaý júrgizgen bolatynbyz. Sol keńesý kezinde joǵary oqý oryndarynyń mamandary 800-ge tarta oqýlyqqa usynys bergen edi. Sonyń ishin­de áleýmettanýshylar kásipke kerek kitap­tardyń ishinen suryptap, ekshep, bú­gin jaryqqa shyǵyp otyrǵan osy eki oqý­lyqty ataǵan bolatyn», dedi Raýan Kenjehanuly. 

Oqýlyqtardyń ǵylymı salmaǵyn, ádis­temelik máselesin sóz etip, dóńgelek ústel ba­synda ortaǵa salynǵan taqy­ryp­ty egjeı-teg­jeıli talqylaǵan joǵa­ry oqý oryn­darynyń oqy­týshylary, áleý­met­tanýshy ǵalymdar bilim baǵytynda bas­talǵan irgeli jumystyń keleshekte de ári qaraı da jalǵasyn tabýy keregin ba­sa aıtty. 

Aıgúl AHANBAIQYZY, «Egemen Qazaqstan»

ALMATY