Memleket basshysynyń tapsyrmasymen QR Premer-Mınıstri Baqytjan Saǵyntaev Prezıdenttiń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýynyń, «Bes áleýmettik bastamasynyń», sondaı-aq memlekettik jáne salalyq baǵdarlamalardyń, kásipkerlik qyzmet týraly jańa zańnyń iske asyrylý barysymen tanysý úshin jumys saparymen Mańǵystaý oblysyna keldi, dep habarlaıdy primeminister.kz.
Jumys sapary barysynda Aqtaý jáne Jańaózen qalalarynda birqatar ónerkásiptik jáne áleýmettik ınfraqurylym nysandary tekserilip, oblystyń jurtshylyǵymen, aktıvimen jáne kásipkerlerimen kezdesýler ótkiziledi.
Premer-Mınıstr Jańaózende Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýy aıasynda «О́zenMunaıGaz» AQ jańa óndiristik bazasynyń mysalynda iri ónerkásiptik nysandardy sıfrlandyrý barysymen tanysady.
Jańaózen qalasyn áleýmettik-ekonomıkalyq damytýdyń keshendi josparyna engizilgen «О́zen Jylý» MKK shaǵyn–JEO nysanynda týrbınalyq qondyrǵynyń jumys isteýi jáne aldaǵy jylý berý maýsymyna qazandyqtyń daıarlyǵy tekseriledi.
Polıtehnıkalyq kolledjdi aralaý kezinde Baqytjan Saǵyntaevqa bilim berý júıesin sıfrlandyrý boıynsha qabyldanyp jatqan sharalar týraly baıandalady. Osynda qala jurtshylyǵymen jáne aktıvimen áleýmettik-ekonomıkalyq damý, Jańaózendi damytýdyń keshendi josparyn iske asyrý, kásipkerlikti, sıfrlandyrýdy keńeıtý jáne odan ári damytý máseleleri boıynsha kezdesý ótkiziledi.
QR Premer-Mınıstri oblys ortalyǵynda «Shlıýmberje» kompanııasynyń óndiristik bazasyn jáne «Aktau Steel» JShS metallýrgııalyq zaýytyn tehnologııalyq jańǵyrtý jáne sıfrlandyrý aıasynda jańa óndiristik jáne servıstik múmkindiktermen tanysady.
Aqtaýǵa jumys saparynyń baǵdarlamasynda Kásipkerlerge qyzmet kórsetý ortalyǵynyń jumysymen tanysý josparlanǵan. Munda ShOB damytýǵa baǵyttalǵan «bir tereze» qaǵıdaty boıynsha qyzmet kórsetý sapasyna, jáne kásipkerlik qyzmet týraly jańa zańdy iske asyrýǵa daıyndyq máselelerine basa nazar aýdarylady.
Mańǵystaý oblysynyń ákimdiginde Baqytjan Saǵyntaev oblys aktıvimen jáne bıznes ókilderimen óńirdi damytýdyń ózekti máseleleri men Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýyn iske asyrý máseleleri boıynsha kezdesý ótkizedi. Kún tártibinde — tehnologııalyq jańǵyrtý, sıfrlandyrý, ekonomıkany odan ári ártaraptandyrý, kadrlardy daıarlaý, eńbek resýrstaryn basqarý jáne bıznesti damytý máseleleri.
Eske sala keteıik, Baqytjan Saǵyntaev Memleket basshysynyń tapsyrmasy boıynsha óńirlerge jumys saparlaryn jalǵastyrýda. Buǵan deıin Premer-Mınıstr Qyzylorda, Ońtústik Qazaqstan, Atyraý, Qaraǵandy jáne Qostanaı oblystaryna jumys saparlarymen baryp qaıtty.