Búgin Beıjińde Memleket basshysy Nursultan Nazarbaevtyń Qytaı Halyq Respýblıkasyna resmı sapary sheńberinde Eurasian Nurly (Bright) Investment Fund Qazaqstan-Qytaı birlesken qoryn qurý týraly kelisimge qol qoıyldy, dep habarlaıdy «Báıterek» ulttyq basqarýshy holdıngi» AQ baspasóz qyzmeti.
Qazaqstan tarapynan Kelisimge «Báıterek» ulttyq basqarýshy holdıngi» AQ Basqarma tóraǵasy Aıdar Áriphanov, Qytaı tarapynan - CITIC Eurasian Capital Limited korporasııasynyń Bas dırektory Sýn Iаn jáne Qytaı-Eýrazııalyq Ekonomıkalyq yntymaqtastyq qorynyń prezıdenti Lın Gan qol qoıdy.
«Qurylǵan qordyń josparlanǵan maqsatty kólemi 500 mln. AQSh dollaryna deıin jetedi. Qordyń negizgi ınvestısııalary ınfraqurylymdy damytý, tabıǵı resýrstardy óńdeý, logıstıka, aqparattyq tehnologııalar, óńdeýshi ónerkásip jáne agroónerkásiptik keshen sııaqty ekonomıkanyń ártúrli salalarynda Qazaqstan aýmaǵynda jobalardy iske asyrýǵa baǵyttalatyn bolady», - dedi A. Áriphanov.
Kelisimdi iske asyrý jónindegi negizgi qazaqstandyq ınstıtýt «Báıterek» holdınginiń enshiles uıymy «Qazyna Kapıtal Menedjment» AQ bolady. Budan buryn, 2017 jylǵy 7 maýsymda Astana qalasynda Shanhaı yntymaqtastyq uıymynyń sammıti sheńberinde Investısııalyq qor qurý jónindegi ózara túsinistik týraly memorandýmǵa qol qoıylǵan.
«Jańadan qurylǵan Eurasian Nurly (Bright) Investment Fund qory Qytaıdaǵy iri ınstıtýsıonaldyq jáne CITIC Group, China Eurasian Economic Cooperation Fund, Asia Investment Finance Group Limited jáne basqa jeke ınvestorlardan Qazaqstan ekonomıkasyna ınvestısııalar tartady. Kelisimge qol qoıý - qazaqstandyq jobalardy qarjylandyrý kózderin keńeıtý jónindegi jemisti jumysymyzdyń nátıjesi», - dedi «Qazyna Kapıtal Menedjment» AQ Basqarma tóraǵasynyń orynbasary Áset Saǵymbekov.