Almatyda Qazaq memlekettik qyzdar pedagogıkalyq ýnıversıtetinde eki birdeı ortalyqtyń ashylý saltanaty ótti. Almaty qalasy Bilim basqarmasy, «Dara» Qaıyrymdylyq qory men atalǵan ýnıversıtet arasynda jasalǵan kelisimshart negizinde «Almaty qalalyq múmkindigi shekteýli balalarǵa arnalǵan qoǵamǵa beıimdeý ortalyǵy» KMM №9 psıhologııalyq-pedagogıkalyq túzetý kabıneti ashyldy.
Elimizde múmkindigi shekteýli balalarǵa bilim berýdi, ınklıýzıvti bilim ustanymdaryn júzege asyrýmen qatar bolashaq pedagog mamandardyń kásibı shyńdalýyn qamtamasyz ete otyryp, atalǵan ortalyqta erekshe qamqorlyqqa muqtaj balalar men jetkinshekterdiń emdelip, saýyǵýyna qolaıly jaǵdaılar jasalǵan.
Ortalyqtyń ashylý saltanatyna qatysyp, tusaýkeser rásimin jasaǵan QR Memlekettik hatshysy G.N.Ábdihalyqova elimizdiń bolashaǵy – balalar úshin jasalǵan osyndaı zamanaýı ortalyqtyń demeýshilerine alǵysyn bildirip, respýblıkamyzda 2016 jyldan bergi aralyqta bilim berý men ǵylymdy damytý boıynsha qabyldanǵan baǵdarlama aıasynda ortalyqtar ashý jolǵa qoıylǵandyǵyn atap ótti. «Búginde respýblıkamyz boıynsha osy baǵyttaǵy 176 kabınet pen ortalyq jumys isteıdi. 2019 jylǵa qaraı mundaı kabınetterdiń sanyn 220-ǵa jetkizý josparlanyp otyr. Mine, búgingi ashylǵan ortalyq osynyń bir dálelindeı. Eń mańyzdysy – ortalyq memlekettik-jekemenshik áriptestik aıasynda ashylyp otyr. Sońjy jyldarda Almaty qalasynyń kásipkerleri «Balapan» baǵdarlamasyna da belsendi atsalysa bastady. Al «Dara» qaıyrymdylyq qory qoldaý kórsetken ortalyqta balalarǵa qolaıly jaǵdaılar jasalǵandyǵynyń kýási bolyp otyrmyz. Balapandarǵa der kezinde tıisti mamandar qoldaý kórsetip, ary qaraı densaýlyqtaryn túzetýge múmkindikter qarastyrylǵan eken. Isterińizge sáttilik tileımin», - dedi Gúlshara Naýshaqyzy.
Ýnıversıtet rektory G.T.Aldambergenova joǵary oqý orny bazasynda ashylyp otyrǵan kásibı ortalyq mamandary múmkindigi shekteýli balalarǵa qoldaý kórsete otyryp, olardyń densaýlyǵynyń jaqsarýyna, ary qaraı sapaly bilim alyp shyǵýy úshin tegin qyzmet etetindigin aıtyp, demeýshilerge alǵysyn bildirdi.
Almaty qalasy Bilim basqarmasynyń basshysy G.M.Hojabergenovanyń aıtýynsha, ońtústik astana boıynsha úsh jarymǵa jýyq erekshe kútimdi qajet etetin balalar tirkelgen. Búginde 14 shtat bólinip, 28 mln teńge shamasynda qarajat qarastyrylǵan. Al Almaty qalasy boıynsha 115 mekteptiń bazasynda ınklıýzıvti bilim berýge jaǵdaı jasalyp, osy maqsattaǵy jumystarǵa da qosymsha qarajat qarastyrylyp otyr. G.Hojabergenova ortalyq ashýǵa arnaıy oryn usynyp otyrǵan ýnıversıtet basshylyǵy men balalar bólmelerin zamanǵa saı kóriktendirip, qajetti qural-jabdyqtar, tehnıkalarmen qamtamasyz etken demeýshilerge alǵys aıtty.
Saltanatty shara barysynda sóz alǵan «Dara» qaıyrymdylyq qorynyń quryltaıshysy G.Dosaevanyń aıtýynsha, bul respýblıka boıynsha ashylyp otyrǵan 25-shi beıimdeý ortalyǵy. G.Dosaeva baldyrǵandar úshin zamanǵa saı múmkindikterdi jasap, demeýshilik jasaǵan S.Kan áýleti men jaqyndaryna ystyq lebizin bildirip, J.Kan hanymǵa qor atynan arnaıy Alǵys hat tabys etti.
Tusaýkeser rásiminen keıin Memlekettik hatshy G.Ábdihalyqova balalar úshin jabdyqtalǵan bólmelerdi aralap, beıimdeý barysyndaǵy jumys josparlarymen tanysty. Ortalyqta tıflopedagog, defektolog, psıholog, logoped, dene shynyqtyrý mamandary qyzmet kórsetedi. Mundaǵy jumystarǵa pedagogtarmen qatar stýdentter de kásibı tájirıbeden óte otyryp, jasóspirimderdiń turmystyq-áleýmettik daǵdylaryn qalyptastyrýǵa, balabaqsha men mektepke daıyndyǵyna kómektesetin bolady. Ortalyqtaǵy balalarǵa on segiz jasqa tolǵanǵa deıin qoldaý kórsetiledi.
Ýnıversıtet qabyrǵasynda ashylǵan «Qazaq alfavıtin latyn grafıkasyna kóshirý» ortalyǵynyń da tusaýkeser saltanatyna qatysqan QR Memlekettik hatshysy G.Ábdihalyqova birneshe baǵytta jumys isteıtin ortalyq jumysymen tanysty. Munda ýnıversıtet mamandary jańa álipbıdi ıgerý sabaqtaryn ótkizetin bolady.
Ortalyqta oqytýshylar ǵana emes, stýdentter, mektep muǵalimderi, bala baqsha tárbıeshileri úshin de latyn qarpine úırenýge múmkindikter qarastyrylǵan. Ortalyqtyń ashylý barysynda latyn qarpin úıretýge baılanysty ýnıversıtet ǵalymdary arnaıy daıyndaǵan baǵdarlama tanystyryldy. Baǵdarlama Android, iOS, Windows platformasyndaǵy lıngvıstıkalyq sózdik, aýdarma jasaıtyn arnaıy saıt, dybys jáne beıne quraldarmen súıemeldengen sandyq elektrondyq oqýlyqtardy qamtıdy. Onda balalarǵa arnalǵan oıyn baǵdarlamalary men mobıldi qosymshalar da engizilgen.
Shara aıasynda ýnıversıtettiń professor-oqytýshylary men stýdentteriniń shyǵarmashylyǵyna arnalǵan «Astana – Ula dala elordasy» kórmesi daıyndalǵan eken. Munda qyryqtan astam kartınalar men qolóner buıymdary qoıylǵan. Aıtar oıyn, pikirin qylqalamnyń aıasyna syıǵyza órnektegen sheberler Astananyń kórikti kelbeti men elimizdiń darhan dala jazırasyn erekshe kórkem jetkize bilgen. Memlekettik hatshy G.Ábdihalyqova kórme uıymdastyrýshylaryna alǵysyn bildirip, tilek kitapshasynda óziniń qoltańbasyn qaldyrdy.
Elvıra SERIKQYZY,
«Egemen Qazaqstan»
ALMATY