Premer-Mınıstr Baqytjan Saǵyntaev Mańǵystaý oblysyna jumys sapary aıasynda Jańaózendegi polıtehnıkalyq kolledjge baryp, onda bilim berý júıesin damytý barysymen tanysyp, monoqalany áleýmettik-ekonomıkalyq damytýdyń ózekti máseleleri boıynsha qala aktıvimen jáne jurtshylyǵymen kezdesý ótkizdi, dep habarlaıdy primeminister.kz.
.
Kolledj dırektory T. Bolatbaeva zamanaýı talaptarǵa sáıkes 13 mamandyq boıynsha joǵary bilikti mamandar men jumysshy kadrlardy daıarlaý týraly aıtyp berdi. Búgingi tańda oqý ornynda 800-den astam adam bilim alýda. Munda Premer-Mınıstr oqý úderisin uıymdastyrý, teorııalyq jáne praktıkalyq sabaqtardy ótkizýge arnalǵan oqý aýdıtorııalaryn jabdyqtaý jaǵdaıymen tanysty.
Premer-Mınıstrge «Sıfrlyq Qazaqstan» memlekettik baǵdarlamasy aıasynda bilim berý salasyn sıfrlandyrý barysy týraly, atap aıtqanda «E-kolledj» jáne «Mektep.edu.kz» aqparattyq júıelerin engizý týraly baıandaldy.
Mańǵystaý oblysynda, jalpy eldegi sekildi, bilim berý júıesin sıfrlandyrý baǵdarlamasy engizilip jatyr. Búgingi tańda mektepter 100% ınternetke qosylǵan, 95% — keń jolaqty ınternet. Barlyq mektepterde Mektep.edu.kz, «Mektepke qabyldaý jáne tirkeý», «E-kolledj» aqparattyq júıeleri jáne baǵdarlamalaý boıynsha sáıkestendirilgen oqý baǵdarlamasy engizilýde.
О́ńir aktıvimen jáne jurtshylyǵymen kezdesý barysynda Áleýmettik-ekonomıkalyq damytýdyń keshendi josparyn, Jańaózende Kásipkerlikti damytýdyń arnaıy josparyn iske asyrý barysy, sıfrlandyrý jáne qala ınfraqurylymyn odan ári damytý keleshegi talqylandy.
Jumyspen qamtý, MÁMS júıesin engizý, kásibı oqytý jáne jastardy eńbekpen qamtý, sondaı-aq ShOB qoldaý kórsetý máselelerine erekshe kóńil bólindi. Bul oraıda Prezıdent 24 mamyrda qol qoıǵan Kásipkerlik qyzmetti jetildirý týraly zań erekshe mánge ıe.
Zańǵa sáıkes memlekettik baqylaý jáne qadaǵalaý júıesi tujyrymdamalyq túrde ózgeredi. Aldyn ala baqylaý ınstıtýty engizilýde, baqylaýdyń 20 salasy shektelýde jáne baqylaý fýnksııalary jáne esepterdi berýmen baılanysty aqparattyq quraldardyń sany 30%-ke azaıady.
Jańaózen ákimi Á. Daýylbaev áleýmettik-ekonomıkalyq damý jáne aldaǵy josparlar týraly baıandady. 2012–2020 jyldarǵa arnalǵan qalany damytýdyń keshendi jospary aıasynda 116 is-sharanyń 53-i oryndaldy. Jospardyń qalǵan tarmaqtary boıynsha jumystar oryndalýda.
2017 jyldyń qorytyndysy boıynsha Jańaózen qalasynyń negizgi makroekonomıkalyq kórsetkishteri tómendegideı: ónerkásip ónimderiniń óndiris kólemi 156 mlrd teńgeni qurady (2016 j. — 120,3 mln teńge). Naqty kólem ındeksi — 117,4%. Negizgi kapıtalǵa salynǵan ınvestısııalar kólemi 30 mlrd teńgeni qurady jáne ótken jyldyń osy kezeńimen salystyrǵanda 39,1% ósti (2016j. — 21 mlrd teńge). Oblystyń ónerkásip óndirisiniń kólemi osy jyldyń qańtar-mamyr aılarynda 3,5% (59,9 mlrd teńge), negizgi kapıtalǵa salynǵan ınvestısııalar — 7% (9,2 mlrd teńge), qurylys jumystary — 6,8% (2,6 mlrd tg), aýyl sharýashylyǵy ónimderiniń jalpy ónimi — 5,7% (166,9 mln teńge), bólshek saýda aınalymy — 4,2% (1,9 mlrd tg) qurady.
Ulttyq ekonomıka vıse-mınıstri A. Jumaǵulov kásipkerlikti damytý barysy týraly aıtyp berdi. Qazirgi tańda qalada 8113 ShOB sýbektisi tirkelgen, onda 21 myńǵa jýyq adam jumyspen qamtylǵan. Ekonomıkalyq belsendi turǵyndar tobyndaǵy ShOB úlesi 30% quraıdy. Jyl basynan beri 4424 jańa jumys orny ashylǵan, bul ótken jylǵydan 521 artyq.
Bilim jáne ǵylym mınıstri E. Saǵadıev óziniń baıandamasynda bilim salasyn damytý jáne granttardy ulǵaıtý jáne stýdentterdi jataqhanalarmen qamtý arqyly bilim alýdyń qoljetimdiligin arttyrýǵa baılanysty «Prezıdenttiń bes áleýmettik bastamasyn» iske asyrý mehanızmderi máselelerin qozǵady.
Oblysta jataqhanalarǵa degen jalpy suranys 2600 oryndy quraıdy, onyń ishinde JOO-lar — 1000, kolledjder — 1600. Stýdentterdi qamtamasyz etý úshin jalpy aýmaǵy 3,56 ga bolatyn 5 jer telimi bólindi.
Eńbek jáne halyqty áleýmettik qorǵaý vıse-mınıstri N. Áltaev óz kezeginde eńbek resýrstary aǵymy, oblystyń jumyspen qamtý ónimdiligi boıynsha mindetteri, jańa ekonomıka úshin kadrlar daıarlaý men eńbekke jumylý boıynsha Jol kartasyn baǵalaý týraly baıandady.
2001 j. bastap jumys kúshiniń sany eki esege, 146-dan 292 myń adamǵa deıin artqan. Jumyspen qamtylǵandar sany artty: 131-den 277 myń adamǵa deıin. О́zin-ózi jumyspen qamtyǵandar úlesi 24-ten 6% deıin azaıdy. Mańǵystaý oblysy eńbek kúshi artyǵymen shoǵyrlanǵan aımaqtardyń biri, óńirden eńbek kúshiniń tapshylyǵy bar aýdandarǵa qonys aýdartý júrgizilip jatyr. Qosymsha 2328 otbasyny (9,4 myń adamdy) kóshirý kózdelip otyr.
Talqylaý barysynda qala jurtshylyǵy men bıznes ókilderi sóz sóıledi. Ortalyq qalalyq aýrýhananyń bas dárigeri M. Saryev, qalalyq ardagerler keńesiniń tóraǵasy K. Bekmaǵanbetov, kásipkerler K. Jalymbetov pen I. Qaldamanov, Jańaózen qalalyq máslıhatynyń hatshysy S. Myńbaı, qalanyń qurmetti azamaty S. О́teýli densaýlyq saqtaý júıesi men aýly sharýashylyǵy ınfraqurylymyn damytý, kásipkerlikti keńeıtý jáne basqa da máselelerdi kóterdi.
Sonymen qatar, monoqalamen tanysý barysynda Premer-Mınıstr №3 jańa qalalyq aýrýhanaǵa bardy, onda mekemeniń tehnıkalyq jaraqtandyrylýymen tanysyp, qabyldaý bólmelerin kórdi, emdelýshilermen jáne medısına qyzmetkerlerimen áńgimelesti.
Jumys sapary ári qaraı oblys ortalyǵy — Aqtaý qalasynda jalǵasady.