Shanhaı yntymaqtastyq uıymy aıasynda sıfrlandyrý men jańa tehnologııalar boıynsha tájirıbe almasatyn alań qurý qajet. Bul týraly búgin Qytaıdyń Sındao qalasynda Shanhaı yntymaqtastyq uıymyna múshe memleketter basshylarynyń keńeıtilgen quramdaǵy otyrysynda Elbasy Nursultan Nazarbaev málimdedi.
«Álemde álemdik valıýta sebetin ártaraptandyrý, valıýtaǵa táýeldilikti tómendetý jáne krıptovalıýtanyń paıda bolýy týraly kóp aıtylyp júr. Osyǵan baılanysty biz ShYU-nyń barlyq elderiniń ulttyq valıýtasynda ózara esep aıyrysýǵa kóshýdi elderimizdiń ekonomıkasynyń qaýipsizdik aspektileriniń biri retinde oılastyrǵan jón. Bizdiń elderimizdiń Ortalyq bankteri búgingi Sındao sammıtinen keıin birge bas qosyp, sáıkesinshe jol kartasyn ázirleýdi bastaı alar edi», - dedi Nursultan Nazarbaev.
Qazaqstan Prezıdenti tórtinshi ónerkásiptik revolıýsııa jaǵdaıynda ekonomıkany sıfrlandyrý men robottandyrýda jańa tehnologııalyq transformasııa júrip jatqanyn aıtty.
Elbasy sıfrlyq jáne zamanaýı tehnologııalardy damytý úshin ózara tájirıbe almasý qajettigine toqtaldy. Al Shanhaı yntymaqtastyq uıymynyń ekonomıkalyq serpilis jasaýyna ınfraqurylymdyq megajobalar yqpal etedi. Bul shara mýltıplıkatıvti áser berip qana qoımaı, uıymǵa múshe memleketterdegi mamandardy jumyspen qamtıdy. Buǵan Beıjiń-Astana-Máskeý-Berlın baǵytyndaǵy temirjol magıstraliniń qurylysy mysal bola alady. Nursultan Nazarbaev mundaı jobalardy qurylymǵa múshe memleketterdiń aıasynda iske asyrýdyń tıimdiligin atap ótti. Ári bul bastamalar Eýrazııalyq ekonomıkalyq odaq pen uıymnyń yqpaldastyǵyn arttyryp, bolashaqta Eýropalyq odaqpen de tyǵyz baılanys ornatýǵa negiz bola alady. Prezıdent sóz sońynda bıznes qaýymdastyqty «Astana» halyqaralyq qarjy ortalyǵymen birlesip jumys isteýge shaqyrdy.