Nursultan Nazarbaev Qytaı Halyq Respýblıkasyna saparynyń qorytyndysy boıynsha buqaralyq aqparat quraldary úshin brıfıng ótkizdi. Bul týraly akorda.kz habarlady.
Nursultan Nazarbaev jýrnalısterge arnalǵan sózinde eki eldiń búkil qarym-qatynastary tarıhynda memleketter basshylary arasynda senimdilik sıpatyndaǵy dıalog ornyqqanyn atap ótti.
– Qytaı Halyq Respýblıkasynyń Tóraǵasy Sı Szınpınmen birge ózara senimdi jáne dostyq qatynastarymyzdy nyǵaıta beremiz. Elderimiz arasynda sheshimin tappaǵan másele joq, kerisinshe, odan ári damý úshin jolymyz ashyq, – dedi Memleket basshysy.
Qazaqstan Prezıdenti ulttyq ekonomıkanyń shıkizattyq emes sektorlaryn damytýdyń mańyzdylyǵyn atap ótip, birlesken ındýstrıaldy-ınnovasııalyq jobalardy júzege asyrý máselesine toqtaldy.
– Biz 51 jobaǵa qatysty ýaǵdalastyqqa qol jetkizdik. Indýstrıaldy-ınnovasııalyq baǵdarlamany júzege asyryp jatyrmyz. Sonyń aıasynda 1200 kásiporyn ashtyq. Bizdiń mindetimiz – shıkizat resýrstaryna táýelsiz ekinshi balamaly ekonomıka qalyptastyrý, – dedi Nursultan Nazarbaev.
Brıfıng barysynda ózara tıimdilikti qamtamasyz etý qaǵıdaty negizinde Qazaqstannyń Qytaımen ekonomıkalyq yntymaqtastyqty damytyp kele jatqany jóninde aıtyldy. Eki jaqty qarym-qatynastar strategııalyq mindetter jáne Qazaqstan ekonomıkasyn damytýdyń basymdyqtary turǵysynan qalyptasyp keledi. Atap aıtqanda, hımııa ónerkásibindegi, taý-ken-metallýrgııa keshenindegi, mashına jasaý, energetıka, agroónerkásip kesheni jáne ekonomıkanyń basqa da salaryndaǵy ındýstrıaldy-ınnovasııalyq jobalardy júzege asyrý kózdelip otyr. Birlesken jobalardy iske asyrý nátıjesinde eksportqa baǵyttalǵan ári joǵary qosymsha quny bar joǵary tehnologııaly otandyq ónim óndiretin kásiporyndar qurylady.
Sonymen qatar, Qazaqstan-Qytaı iskerlik keńesi otyrysynyń nátıjeleri de atap ótildi. Sonyń barysynda eki eldiń bıznesmenderi jalpy somasy shamamen 13 mıllıard teńge bolatyn 40 qujatqa qol qoıdy.
Nursultan Nazarbaev iskerlik toptar men jobalardy júzege asyrýǵa atsalysatyn sharýashylyq sýbektiler Qytaı Halyq Respýblıkasymen ınvestısııalyq yntymaqtastyqty ilgeriletýdiń negizgi draıverleri bolyp sanalatynyna nazar aýdardy. Bul úderiste jobalyq qarjylandyrý tetikteri belsendi paıdalanylady. Soǵan sáıkes jobanyń ózi kepildemelik qamtamasyz etýshi bolyp sanalady.
Sonymen qatar, Nursultan Nazarbaev eldiń kólik-tranzıt áleýetin arttyrýǵa baǵyttalǵan ınfraqurylymdyq jobalardy oryndaý máselelerine toqtaldy.
Memleket basshysy agroónerkásip keshenindegi yntymaqtastyqty tereńdetýge Qytaıdyń múddelilik tanytyp otyrǵanyn da atap ótti.
Qazaqstan Prezıdenti Shanhaı yntymaqtastyq uıymy aıasynda ulttyq valıýtalarmen ózara esep aıyrysý jóninde usynys bildirgeni týraly tolyq áńgimelep, Qytaı Halyq Respýblıkasynyń Tóraǵasy Sı Szınpınmen bolǵan kelissózder barysyna toqtaldy.
– Senim bolǵan kezde barlyq másele sheshiledi. Kez kelgen jaǵdaıda óz elińniń múddesin eskerý kerek. Kelissóz júrgizý qashan da qıyn, sol sebepti buǵan muqııat daıyndalamyn. Bul – halqymnyń maǵan júktegen jaýapkershiligi, – dedi Nursultan Nazarbaev.