Qytaı Halyq Respýblıkasynyń Southwest ýnıversıtetinde Qytaı-Qazaqstan mádenı-bilim berý ortalyǵy resmı túrde ashyldy. Ortalyqtyń saltanatty ashylýy osy iske uıytqy bolǵan L.N.Gýmılev atyndaǵy Eýrazııa ulttyq ýnıversıtetinde onlaın júıesi arqyly kórsetilip, oǵan atalǵan ýnıversıtet jáne Southwest ýnıversıtetiniń mamandary qatysty.
Bıyl naýryz aıynda L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov pen fılologııa fakýltetiniń dekany Sholpan Jarqynbekova Southwest ýnıversıtetine arnaıy baryp, kelisimshart jasasqan bolatyn. Mine, úsh aı ótken soń Qytaı-Qazaqstan mádenı-bilim berý ortalyǵy saltanatty túrde ashylyp, óz jumysyn bastap ketti. Bolashaqta eki ýnıversıtet arasyndaǵy akademııalyq utqyrlyq, ǵylymı-zertteý qyzmeti, professor-oqytýshylar almasý, qos dıplom baǵdarlamasy osy ortalyq arqyly júzege aspaq.
Shara barysynda fılologııa fakýltetiniń basshysy Sholpan Jarqynbekova naýryz aıynda talqylanǵan barlyq josparlardyń sátti júzege asyp jatqandyǵyn jetkizdi. Bul ortalyq eki ýnıversıtet arasynda ǵana emes, eki el arasyndaǵy dostyq qarym-qatynastyń aıqyn dáleli ekeni jáne bıyldan bastap bul ortalyqta L.N.Gýmılev atyndaǵy EUÝ-dyń qazaq tili kafedrasynyń oqytýshylary qazaq tilinen sabaq beretinin aıtty. Al Southwest ýnıversıteti shet tilder fakýltetiniń dekany Lıý Chenıý tikeleı efır barysynda aldaǵy ýaqytta eki ýnıversıtet arasynda oqý, bilim jáne ǵylym salasyn damytyp, sondaı-aq mádenı is-sharalar uıymdastyrylyp, jastar úshin qyzmet jasaıtynyn jetkizdi. Onyń aıtýynsha, ýnıversıtetpen aradaǵy kelisimshart negizinde qurylǵan ortalyq eki el arasynda altyn kópir bolmaq. Bul ortalyq L.N.Gýmılev atyndaǵy EUÝ-dyń bastamasymen ashylǵan alǵashqy ortalyq emes. Buǵan deıin Mınsk pen Iranda ashylsa, taıaý bolashaqta Túrkııa men Úndistanda da ashylady dep josparlanyp otyr.
Jansaıa JUMASh,
L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetiniń 1-kýrs stýdenti