Qandaı qoǵamda bolmasyn múmkindigi shekteýli, dúnıege kele salysymen taǵdyrdyń teperishine tap bolǵan, aıyryqsha qamqorlyq pen qoldaýdy qajet etetin balalar bolmaı turmaıdy.
Olardyń alańsyz em alýy men demalýyna jáne azamat bolyp qalyptasýyna múmkindikter týǵyzý, boıyndaǵy keseli men syrqatynan saýyǵyp ketýine qol ushyn berý, elimizdegi atqarýshy bılik ókilderiniń basty paryzy bolmaq. Osy oraıda Aqtóbe aımaǵynda laıyqty qadam jasalyp, múmkindigi shekteýli balalarǵa arnalǵan 180 oryndyq oblystyq tirek jáne túzetý balabaqshasy iske qosyldy.
Mektepke deıingi arnaýly balalar mekemesi zamanaýı qural-jabdyqtarmen jabdyqtalǵan. Munda 16 top qurylǵan. Onyń árqaısysynda 12 bala tárbıelenedi. Olarǵa túzetý balabaqshasynda tirek-qımyl júıesi buzylǵan, tili men qulaǵynyń múkisi bar, sondaı-aq daýn sındromyna shaldyqqan balalr tıisti emdeý baǵdarlamasynan óte alady. Osyndaı tártipti psıhıkalyq damýy tejelgen tulǵalar men aýtıst balalarǵa qatysty da aıtýǵa bolady. Bul jáıt arnaýly balabaqshadaǵy tárbıe tásilderi keshendi kózqarasqa arqa súıeıtinin kórsetedi. Onyń tek bir baǵyt boıynsha jumys isteıtin, ıaǵnı til múkistigi bar nemese kórý múmkindigi shektelgen balalarǵa arnalǵan balabaqshalardan basty artyqshylyǵy men ózgesheligi de osynda. Bir sózben aıtqanda tirek pen túzetý orny ár túrli dertter men syrqattarǵa ushyraǵan baldyrǵandardy bir jerge shoǵyrlandyra alady. Balabaqsha meńgerýshisi Ásııa Seıitovanyń aıtýynsha munda 100-den astam qyzmetker jumysqa qabyldanǵan. Onyń arasynda joǵary jáne arnaýly oqý oryndaryn bitirgen túlekter de bar. Múmkindigi shekteýli balalarǵa arnalǵan oblystyq tirek jáne túzetý balabaqshasy ǵımaraty «Baqytty bala» jobasy aıasynda boı kótergen.
Temir Qusaıyn,
«Egemen Qazaqtan»
Aqtóbe
Sýrette: tirek jáne túzetý balabaqshasynan kórinis