Memlekettik qyzmet isteri jáne sybaılas jemqorlyqqa qarsy is-qımyl agenttiginiń Ǵalym Tursynbaev jetekshilik etetin oblystyq departamenti kóptegen mádenı, rýhanı is-sharalarǵa bastama kórsetip, jurtshylyq tarapynan úlken qoldaýǵa ıe bolyp júr. Alaıda osy joly uıymdastyrylǵan qaıyrymdylyq konserti bireýlerge jaqpaı qalsa kerek.
13 jastaǵy Ámir Ǵabdýllın ahondroplazııa dertine shaldyqqan. Býyn súıekteriniń ósýi tejelgendikten qatarlastaryna qaraǵanda áldeqaıda áljýaz. Qol-aıaqtaryn uzartý úshin úsh ret ota jasalypty. Qınalǵanyn qansha bildirtpeýge tyrysqanymen, anasy Rozanyń shyǵar jany bólek. Onyń beıneúndeýi departament ujymyn beı-jaı qaldyrmaǵan. Elimiz boıynsha memlekettik qyzmetshiler arasynda tuńǵysh ret qaıyrymdylyq konsertin ótkizýge muryndyq bolǵan.
Osy máselege qatysty Petropavl qalalyq máslıhatynyń depýtaty Pavel Afanasev Ǵ.tursynbaevqa syn aıtty. Onyń sózine sensek, aksııa «bopsalaýshylyqtyń», demeýshilikke zorlap-kúshteýdiń úlgisi kórinedi. Al Ǵ.Tursynbaevtyń buǵan qarsy aıtar ýáji az emes. «Iá, Pogodın atyndaǵy orys drama teatrynda «20 qaıyrymdy is» aksııasy aıasynda konsert ótkizýge tikeleı atsalysqanymyz, uıymdarǵa hat joldap, bılet satyp alýǵa ótinish jasaǵanymyz ras. Qarajattyń qaıda aýdarylatynyna deıin kórsetildi. Usynysymyzdy «Dom» respýblıkalyq qoǵamdyq qory da qoldady. Turmysy tómen otbasylarǵa, saýyǵyp ketýden úmitti beıkúná balalarǵa qolymyzdan kelgenshe járdemdessek, nesi aıyp? Múmkindigi shekteýli balaqaılardyń júzderine kúlki úıirilip, bal-bul jaınap júrgenderine eshteńe jetpeıdi». Zeınetkerlerge de, jetim balalarǵa da qamqor qolyn sozýǵa nıet etken basshy ilkimdi iske qatysty mundaı synnyń aıtylǵanyna qynjylatynyn jetkizdi.
О́mir ESQALI, «Egemen Qazaqstan»
Soltústik Qazaqstan oblysy