Qaraǵandy oblysyndaǵy Aqtoǵaı aýdany týrızm salasynan nápaqa izdegen jandardyń nazaryn ózine aýdaryp júrgen jeruıyq mekenniń biri. Taıaýda osy aýdandaǵy Bektaýata baýraıynda týrıstik-ólketanýshylar ekspedısııalyq jasaqtarynyń «Ashyq álem. Jas týrıst. Jasóspirim izdeýshi» atty oblystyq forýmy ótti.
Tabıǵaty tamasha ólkeni úsh kún dúbirge bólegen dýmandy jarysqa 20 komanda qatysyp, 300-den astam óren baq synady.
Bıylǵy saıysta jas týrıster ózderiniń ǵylymı-zertteý jobalaryn qorǵap, qyzyq pen qıyndyqqa toly túrli týrıstik marshrýttardy baǵyndyrdy. Ekskýrsııalyq baǵdarlaý synaǵynan ótip, bard ánderinen ótken óner baıqaýynda baq synady. Sonymen qatar saıahatqa qushtar órender forým qonaqtaryna teatrlandyrylǵan qoıylymdardy sahnalap, ónerden de quralaqan emestikterin baıqatty.
Forým sońynda jeńimpazdar men júldegerler arnaıy dıplomdarmen jáne kýboktarmen marapattaldy. Jas týrıster saıysyna qatysqan komandalardyń árqaısysyna 1 mıllıon teńgeniń sertıfıkattary tabys etildi. Bul qarajat olarǵa Intellektum zııatkerlik oıynyn satyp alý múmkindigin beredi.
Qaırat ÁBILDA,
«Egemen Qazaqstan»
Qaraǵandy oblysy,
Aqtoǵaı aýdany