Qazaqstan aýmaǵynda uıaly baılanys qurylǵylaryn tirkeý erejeleri bekitildi. Bul ereje elimizdiń «Baılanys týraly» zańy negizinde jasalǵan. Oǵan sáıkes el aýmaǵynda jasalǵan nemese syrttan ákelingen uıaly baılanystyń abonenttik qurylǵylary túgel tirkelýi qajet.
Baılanys qyzmetin paıdalanýshylar úshin qurylǵyny tirkeý qıyndyq týdyrmaıdy. Aqparat jáne kommýnıkasııalar mınıstrliginiń málimeti boıynsha, jeke tulǵalar baılanys qurylǵylaryn ótinish berilgen sátten bastap 4 saǵatta, zańdy tulǵalar – 8 saǵatta aqysyz negizde tirkeı alady. On tórt pen on segiz jas aralyǵyndaǵy kámeletke tolmaǵan azamattar baılanys qurylǵylaryn zańdy ókilderiniń kelisimimen tirkeıdi, al 14 jasqa deıingi kámeletke tolmaǵandar úshin zańdy ókilderi nemese ata-analary tarapynan júzege asyrylady.
Uıaly baılanys qurylǵylaryn tirkeý jáne qaıta tirkeý úshin qurylǵynyń ıesi qyzmet kórsetýdiń avtomattandyrylǵan qyzmet kórsetý júıesi arqyly nemese uıaly baılanys operatorlarynyń keńselerine tómendegi tizimdegi qujattardy usynýy tıis:
1) JSN (jeke tulǵalar úshin) nemese BIN (zańdy tulǵalar úshin); 2) abonenttik uıaly baılanys qurylǵysynyń ıdentıfıkasııalyq (IMEI) kody; 3) abonenttik uıaly baılanys qurylǵysynda qoldanylatyn abonenttik nómiri.
Eń bastysy tutynýshylar uıaly baılanys qurylǵylaryn 2018 jyldyń sońyna deıin tirkeýden ótkizip úlgerýi tıis. О́ıtkeni uıaly baılanys qurylǵylary tirkelmegen jaǵdaıda 2019 jyldyń 1 qańtarynan bastap olarǵa uıaly baılanys qyzmeti kórsetilmeıdi.
Aıta ketý kerek abonentter uıaly baılanys qurylǵylaryn tirkeý úshin baılanys operatorlarynyń abonenttik bólimderine barmasa da bolady. Olar qurylǵylaryn tirkeýdi onlaın rejiminde nemese SMS arqyly júzege asyra alady.
Serik ÁBDIBEK, «Egemen Qazaqstan»