Qadirmendi qaýym! Barshańyzdy musylman úmbetiniń ulyq meıramy – Oraza aıtpen shyn júrekten quttyqtaımyn. Qasıetti juma kúnimen qatar kelgen aıt meıramy qutty-berekeli bolǵaı!
Bizdiń halqymyz ramazan aıyn ejelden erekshe qasterlep, «On eki aıdyń sultany», dep qadirlegen. Al mereke kúnderi aǵaıyn-jurt bir-birine «aıt qabyl bolsyn» aıtyp, jyly lebizderi men izgi tilekterin arnaǵan. Aǵaıyn-týysqa aıttap barý, balalar men qadirli qonaqtarǵa aıttyq berý – san ǵasyrdan beri jalǵasyp kele jatqan ıgi dástúr.
Oraza aıt – qonaqjaılyq pen meıirbandyqtyń, dostyq pen tatýlyqtyń merekesi. Izettilik pen izgilikke, birlik pen ıgilikke úndeıtin bul meıram elimizde turatyn túrli etnostardy da yntymaqqa uıystyra túsedi.
«Aıt» – «merekeleý», «hal surasý», «bir-birin qýantý», «qýanyshqa toptalý» degen sóz. Demek bul kúnderi otbasyn, aǵaıyn-týys, kórshiler men kómekke muqtaj jandardy qýanyshqa bólep, alǵysyn alýdyń saýaby úlken. Jabyqqan jannyń kóńilin jadyratyp, shańyraqty shat-shadyman kúıge bólep, syılyq úlestirý de – merekeniń sánin keltire túsetin izgi amaldyń biri.
Ulyq meıramda tolyq jýynyp, jupar ıis sebinip, jamaǵatpen aıt namazyna qatysýdyń saýaby erekshe. Aıt namazyna barýdan buryn qurmadan dám tatý – paıǵambarymyz Muhammedtiń (oǵan Allanyń salaýaty men sálemi bolsyn) súnnet amaly.
Oraza aıt – bir aı boıy tózimdilik tanytyp aýyz bekitken, yqylaspen qaıyrymdylyq jasaǵan pendeniń qurmet pen marapatqa, qýanysh pen saýapqa keneletin sát.
Alla taǵala: «Men paryz etken orazany pendelerim ótep, aqysyn alýǵa (aıt namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...», degen.
Qurmetti baýyrlar! Musylman qaýymynyń osynaý shýaqty meıramynda árbir shańyraqqa baıandy baqyt, Allanyń amandyǵy men bereketin tileımin.
Qasıetti ramazan aıynda ustaǵan orazamyz, jasaǵan árbir qaıyrly amaldarymyz, duǵa-tilekterimiz qabyl bolsyn!
Elimiz aman, jurtymyz tynysh, Allanyń syıy – Táýelsizdigimiz baıandy bolǵaı! Ámın!
Serikbaı qajy ORAZ, Qazaqstan musylmandary dinı basqarmasynyń tóraǵasy, Bas múftı