Basqosýda 2018 jylǵy Memlekettik syılyqty alý úshin kelip túsken jumystar, sondaı-aq olardyń tirkelýi, qaralýy, qoıylatyn talaptarǵa sáıkestigi týraly aqparat tyńdaldy, dep habarlaıdy Aqordanyń baspasóz qyzmeti.
Komıssııa otyrysyn ashqan Gúlshara Ábdiqalyqova Elbasy Nursultan Ábishuly Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy «Jańǵyrý ataýly burynǵydaı tarıhı tájirıbe men ulttyq dástúrlerge shekeden qaramaýǵa tıis. Kerisinshe, zamana synynan súrinbeı ótken ozyq dástúrlerdi tabysty jańǵyrýdyń mańyzdy alǵysharttaryna aınaldyra bilý qajet» degen sózine nazar aýdardy.
– Syılyq otandyq mádenıettiń damýyna qosylǵan qundy úles bolyp sanalatyn ádebıet pen óner salasyndaǵy asa úzdik shyǵarmalar úshin beriledi, – dedi Memlekettik hatshy.
Komıssııa qaraýyna kelip túsken jumystar 3 seksııa – ádebıet; mýzyka, teatr jáne kıno; beıneleý óneri jáne sáýlet seksııalary boıynsha saralandy. Seksııalarda jalǵasqan jasyryn daýys berý qorytyndysy boıynsha baıqaýdyń aqtyq kezeńine jiberiletin shyǵarmalar irikteldi. Komıssııanyń ortaq sheshimi boıynsha kelesi kezeńge ótken úmitkerler tizimi bekitildi.
Qazaqstan Respýblıkasynyń Ádebıet pen óner salasyndaǵy memlekettik syılyǵyn berý jónindegi komıssııa týraly erejege sáıkes, avtorlar men jumystar jónindegi aqparat qoǵamda keńinen talqylaný úshin «Egemen Qazaqstan» jáne «Kazahstanskaıa pravda» gazetterinde jarııalanatyn bolady.